ქუთაისიპოსტი

ქუთაისში, რიონისპირზე, ხანდაზმული ცოლ-ქმარი მუდმივი შიშის ქვეშ ცხოვრობს.
მათი მთავარი საფიქრალი ნახევრად ჩამონგრეული სახლია, რომელიც დღითიდღე საცხოვრებლად უარგისი ხდება.

"აქ მე და ჩემი 76 წლის მეუღლე ვცხოვრობთ. წვიმა და ქარი წვალებაა ჩვენთვის. წყალი ჩამოგვდის და სახლი გვილპება. შეიძლება სახლი დაგვენგრეს და ადამიანების სიცოცხლეც შეიწიროს. მეუღლეს ინსულტი აქვს გადატანილი, მუდამ წევს და ავადმყოფ ადამიანს ამ პირობებში ცხოვრება უწევს,” - ამბობს დავით და კონსანტინეს ქუჩა #26-ში მცხოვრები ოჯახის დიასახლისი, ქეთევან თოფურია.

მისი თქმით, სახლს საფრთხეს ყოველი წვიმის მოსვლის შემდეგ ექმნება. ხის ავარიული სახლი, გამუდმებით იტბორება. ქეთევან თოფურია ამბობს, რომ საცხოვრებელსაც ვერ ტოვებს და ვერც უკეთეს პირობებს უქმნის ავადმყოფ მეუღლეს.

შენობას, სადაც ცოლ-ქმარი ცხოვრობს, საყრდენი ბოძიც გამოცლილი აქვს, რის გამოც საფრთხე არა მხოლოდ ამ ოჯახს, არამედ მეზობლებსაც ექმნებათ.

ვერცერთი მათგანი პრობლემას ვერ აგვარებს, რადგან რიონისპირა განაშენიანება კულტურულ მემკვიდრეობად არის აღიარებული და ნგრევის პირას მისულ შენობას მეპატრონე დამოუკიდებლად, საკუთარი სურვილის მიხედვით ვერ შეაკეთებს.

მათი ერთადერთი იმედი, მთავრობის 2018 წლის დაპირება იყო, რომლის მიხედვითაც რიონისპირა სახლების სრული რეკონსტრუქცია უნდა მომხდარიყო.

ამ დრომდე შეუსრულებელი დაპირების გამო, ადგილობრივები ამბობენ, რომ ერთ დროს ულამაზეს რიონისპირზე, ახლა ცხოვრება საფრთხის შემცველია.



რიონისპირა სახლების აღდგენა ქუთაისის მერიამ 2018 წელს ყველაზე მასშტაბურ პროექტად დაასახელა. რეაბილიტაციის პროექტირებაზე 944 000 ლარის ღირებულების ტენდერი რეგიონალური განვითარების ფონდმა 2019 წელს გამოაცხადა.

ქუთაისში რიონისპირა სახლების რეაბილიტაციისთვის საჭირო პროექტირებისთვის სახელმწიფო შესყიდა 2019 წელს რეაგიონალური განვითარების ფონდმა გამოაცხადა. ელექტრონული ტენდერი შპს „კარკასმა“ მოიგო. მხარეებს შორის ხელშეკრულება, 2019 წლის 11 ივნისს, 799 999 ლარზე გაფორმდა.

დოკუმენტის მიხედვით, საპროექტო მომსახურება 4 ეტაპს მოიცავდა, რომლის მიხედვით, კომპანიას სამუშაოები 2020 წლის თებერვალში უნდა დაესრულებინა. სწორედ ვადაში შეუსრულებლობა გახდა სადავო.

კერძოდ, მგფ, რომელიც სამუშაოების დამკვეთია,"კარკასს" ხელშეკრულებით კუთვნილ თანხას იმ მიზეზით არ უხდიდა, რომ კომპანია საპროექტო სამუშაოებს განსაზღვრულ ვადებში არ ასრულებდა.

თავის მხრივ, შპს "კარკასში" განმარტავენ, რომ მათ მიერ დარღვევას არ ჰქონია ადგილი და პირიქით, ფონდი სამუშაოების შესრულების შესახებ გაგზავნილ დოკუმენტაციას შეგნებულად არ ნახულობდა. ამავდროულად, რადგან დასაპროექტებელი ობიექტი კულტურული მემკვიდრეობის ძეგლის მატარებელი იყო, შესაბამისს სააგენტოში პროექტის განხილვა მიმდინარეობდა, რასაც დრო დასჭირდა. ამის შემდეგ ფონდმა კომპანიას ჯერ ხელშეკრულება შეუწყვიტა, შემდეგ კი დავამ სასამართლოში გადაინაცვლა.

სასამართლო პროცესი წლებია გრძელდება.