ქუთაისიპოსტი

ქუთაისი ხდება "ევროპის დედაქალაქი", როგორც იუნესკოს ლიტერატურული ქალაქი", - მიაჩნია მწერალ ირაკლი მაჩიტაძეს.

ეს სტატუსი ქუთაისს 2023 წელს მიენიჭა, როდესაც ქალაქი იუნესკოს შემოქმედებითი ქალაქების ქსელში გაერთიანდა.

ამ სტატუსით ქალაქი ევროპის ნაწილად პოზიციონირდა. ქალაქი, რომელსაც გააჩნია მდიდარი ლიტერატურული მემკვიდრეობა, რაც ქუთაისურ ლიტერატურულ ტრადიციებს და ამბიციებს ესადაგება.

სტატუსი ოთწლიანია და მოიცავს ღონისძიებათა მთელ ციკლს. მათ შორის მთარგმნელობით სამუშაოებს. მწერალ ირაკლი მაჩიტაძეს მიაჩნია, რომ ყველაზე მეტად ეს სჭირდება დღეს ქართულ ლიტერატურას. ევროპელმა მკითხველმა გაიცნოს თანამედროვე ქართველი ავტორები, რის საშუალებასაც ეს სტატუსი და ამ ქსელის წევრობა იძლევა.

თუმცა მწერალი აქვე მიუთითებს შემაფერხებელ ფაქტორებზე, რაც ევროპისკენ სვლის ამ გზაზე გაჩნდა და რამაც შეიძლება ოთხი წლით აღარ გაახანგრძლივოს არც სტატუსი და ყველა ის ლიტერატურული პროცესი გაყინოს, რასაც ეს სტატუსი მოიცავს.

"რუსული კანონის" მიღება და ხელისუფლების მხრიდან საგარეო კურსის ცვლისკენ გადადგმული ნაბიჯები, მწერლის აზრით, საქართველოს აცილებს ევროპას და ევროკავშირს. ამ ცვლილებებმა შეიძლება გამოიწვიოს ბევრი პროექტის გაუქმება საქართველოში, რომელთაც დასავლური ორგანიზიააციები უჭერენ მხარს და ახორციელებენ.



"უცხოური გავლენის გამჭვირვალობის შესახებ" პროექტი "ქართულმა ოცნებამ" 3 აპრილს მეორედ დააინიცირა. 14 მაისს კი, ხალხმრავალი აქციებისა და საერთაშორისო კრიტიკის მიუხედავად, მესამე, საბოლოო მოსმენით მაინც მიიღო.

კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ, "უცხოური ძალის ინტერესების გამტარებლის" სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგებოდა და დღემდე ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.

კანონპროექტი, 2023 წლის მარტში, მოსახლეობის პროტესტის შედეგად "ოცნებამ" უკან გაიწვია. მაშინდელმა პრემიერ-მინისტრმა ირაკლი ღარიბაშვილმა და უმრავლესობის წარმომადგენელმა ირაკლი კობახიძემ პირობა დადო, რომ ამ კანონს აღარასოდეს მიუბრუნდებოდნენ.