ქუთაისიპოსტი

მესხიშვილის თეატრში პუბლიკას მორიგი პრემიერა შესთავაზეს.

სპექტაკლი Perpentuum Mobile  (მატვეი ვიშნეკის პიესის "რა ვუყოთ ამ ვიოლინოს" მიხედვით) რეჟისორმა გიორგი თავაძე (იმარინდო) განახორციელა.

წარმოადგენა ერთმოქმედებიანია და მასში მესხიშვილის თეატრის მსახიობები მარიკა სამანიშვილი, გიორგი შალამბერიძე, თენგიზ ჯავახაძე და გიორგი ქართველიშვილი მონაწილეობენ.

როგორც რეჟისორი აცხადებს, მატვეი ვიშნეკი მისთვის განსაკუთრებით საინტერესო ავტორია როგორც სათქმელის ფორმით, ისე შინაარსით.

"პიესა სტილისტურად აბსურდის თეატრის ელემენტებისგან შედგება, თუმცა მკვეთრი სიუჟეტიც აქვს. ბრმა აბსურდში არ შედის. გარკვეული ფაბულა გააჩნია. ავტორის სათქმელი ზუსტი ანალოგია დღევანდელობის და ჩვენი რეალობის, გაუცხოება რეალობიდან, გარემოდან, ერთმანეთიდან", - აღნიშნავს რეჟისორი.

სპექტაკლის მსვლელობის პროცესში დარბაში პუბლიკის განლაგებაც განსხვავებულია. მაყურებელი სცენას იკავებს და ახლო კონტაქტში შედის სპექტაკლში გათამაშებულ ისტორიასთან.

"გარემო მოითხოვს კამერულ ატმოსფეროს და სხვა ინტიმს. ტექსტისთვის მნიშვნელოვანია კავშირი, ახლო კონტაქტი მაყურებელთან. უნდა იყოს პუბლიკის დიდი ჩართულობა და მსახიობებიც გარკვეულწილად უნდა იყვნენ ე.წ. მსხვილი ხედით ნაჩვენები", - აღნიშნავს "იმარინდო."

მსახიობები საუბრობენ საინტერესო მუშაობის პროცესზე და რეჟისორის მსახიობთან დამოკიდებულების გამორჩეულ პრინციპზე. ისინი მიუთითებენ პრობლემის აქტუალობაზე, რასაც სპექტაკლი სვამს.

"სპექტაკლი გვიყვება ადამიანებზე საზოგადოებაზე, რომელიც ვაკუუმშია მოქცეული. საზოგადოებაში ბევრი პრობლემაა გაგების, განათლების, აღქმის მიმართ. იგი ცხოვრობს რაღაც ჩარჩოებში. ითხოვს იმას, რომ ყველაფერი გააკეთოს სახელმწიფომ, პრობლემა მოაგვაროს სხვამ, არ ცდილობს თვითონ გააკეთოს და გადადგას კონკრეტული ნაბიჯი", - ამბობს მსახიობი გიორგი შალამბერიძე.