ქუთაისიპოსტი

საქართველოს განათლებისა და მეცნიერების სამინისტრო სასკოლო ბუფეტებში არსებული მდგომარეობის გამოსწორებასა და ამ სფეროს რეგულირებას იწყებს.

ძველი ხელშეკრულების ვადის გასლის შემდეგ საგანმანათლებლო დაწესებულებები იმ მეწარმეებთან გააფორმებენ ხელშეკრულებას, რომლებიც უწყების რეკომენდაციას გაითვალისწინებენ.

ეს კი, მინისტრის 2017 წლის ხუთი მაისის #401 ბრძანებით გახდა შესაძლებელი.

სამინისტროს პოზიციით, სასკოლო კვების ორგანიზებაში ცვლილებების შეტანა ადამიანის ჯანმრთელობაზე არაჯანსაღი საკვების უარყოფით ზეგავლენასა და სკოლაში ჯანსაღი კვების სტანდარტების დანერგვის მნიშვნელობას უკავშირდება.

აღნიშნულ რეგულაციას იწონებენ  მშობლები. მანანა ცირეკიძის შვილი პირველკლასელი მომავალ წელს გახდება. ის სამინისტროს ახალ ინიციატივას მიესალმება, რადგან თვლის რომ ჯანსაღი პროდუქტებით კვება ყველასთვის და მით უმეტეს მოზარდებისთვის სასიცოცხლოდ მნიშვნელოვანია.

„ჯერ ერთი, სახლში მომზადებული საჭმელიც არაა ბოლომდე ჯანსაღი და ეს წასახემსებლები კვებისთვის საშიშია. თუკი ამ კუთხით რამე შეიცვლება, რა თქმა უნდა, მოხარული ვარ“, - ამბობს მანანა ცირეკიძე.

საქართველოს განათლებისა და მეცნიერების სამინისტრომ, სკოლებში ჯანსაღი კვების დანერგვის მიზნით, მეთოდური რეკომენდაცია შეიმუშავა, რაც ზოგად საგანმანათლებლო დაწესებულებებში ჯანსაღი კვების პრინციპების გატარებას ითვალისწინებს.

რა იკრძალება სასკოლო კვებაში და რომელია იმ პროდუქტების ჩამონთვალი, რომელიც სკოლაში დაშვებულია, ნახეთ ქუთაისიპოსტის მიერ მომზადებულ ინფოგრაფიკაში:

სკოლებში აკრძალული პროდუქციის რეალიზაციის მონიტორინგი კი საქართველოს მეცნიერებისა და განათლების სამინისტროს ზოგადი განათლების მართვისა და განვითარების დეპარტამენტის მონიტორინგისა და კოორდინაციის სამმართველოს, საჯარო სკოლის დირექციასთან ერთად დაევალება.

პროექტის მენეჯერის, მაია მუშკუდიანის თქმით, მოიჯარე კომპანიებთან, რომლებთანაც ხელშეკრულება გაფორმებულია, ბრძანება მხოლოდ სარეკომენდაციო ხასიათის იქნება, ხოლო ვინც ახალ ხელშეკრულებას დადებს, იმათთვის სავალდებულო იქნება. მისი შეუსრულებლობა კომპანიას ხელშეკრულების შეწყვეტამდე მიიყვანს.

„უნდა გაითვალისწინონ, რომ როდესაც მათ ხელშეკრულებას ვადა გაუვა, იმ პირობით განახლდება, რაც ახლა არის გამოქვეყნებული მინისტრის ბრძანება“, - ამბობს პროექტის მენეჯერი, მაია მუშკუდიანი.

ქუთაისის საჯარო სკოლების წარმომადგენლები სამინისტროს ახალ ინიციატივას მიესალმებიან. სკოლის წარმომადგენლების თქმით, მოზარდების ჯანსაღი საკვებით უზრუნველყოფა მათთვისაც პრიორიტეტულია.

„ჩვენთვის, დირექტორებისთვისაც კარგია, რადგან გვაქვს დოკუმენტები, რომლითაც მეწარმეებს პირდაპირ მოვთხოვთ ამ ნორმების დაცვას“, - ამბობს მე-12 საჯარო სკოლის დირექტორი, ნათია სულავა.

დროულს უწოდებს ახალ რეკომედნაციებს ქუთაისის #2 საჯარო სკოლის დირექტორი, მურად ჯიშკარიანიც.

„ჩვენს ბავშვებს ძალიან ცუდ სამსახურს ვუწევდით, იმიტომ რომ ყველაფერი იყიდება ბუფეტში და ეს წლების მერე მათ ჯანმრთელობას ძალიან ცუდად დაარტყამს. საბედნიეროდ, პირველი ნაბიჯი გადაიდგა და ამ კუთხით“, - ამბობს მურად ჯიშკარიანი.

მშობლებისა და  სკოლის დირექტორებისგან განსახვავებით, ახალი ინიციატივით უკმაყოფილოები არიან მეწარმეები, რომლებიც ამ დრომდე სკოლის ბუფეტებს ამარაგებენ.  ისინი ამბობენ, რომ ახალი რეგულაციები მათ ბიზნესს დააზარალებს.

ინდ. მეწარმე ხატია გოგოლაძეს ხელშეკრულება ქუთაისის ორ საჯარო სკოლასთან ჰქონდა გაფორმებული. მიმდინარე წლის 15 მაისს მე-12 სკოლასთან გაფორმებულ მის ხელშეკრულებას ვადა დაუმთავრდა. თუმცა, აუქციონში ხელახლა მონაწილეობას, კანონში შესული ცვლილებების გათვალისწინებით, კვლავ გეგმავს.  ის ახალი დადგენილების მიღების შემდეგ გამოწვეულ ზარალზე საუბრობს.

„კრემიანი საკვები ჩვენ არ შეგვქონდა, მაგრამ იყო ქართული ნაწარმი, "ბარამბო" მაგალითად არ არის ისეთი, რომ ბევრი შოკოლადი იყოს და ასეთი რაღაცეები, მე მგონი, დასაშვებია ბავშვისთვის“, - ამბობს ინდ. მეწარმე, ხატია გოგოლაძე.

40-50 %-იან ზარალზე საუბრობს ინდ. მეწარმე კახა მეფარიშვილიც, რომელიც ამ ბიზნესში შვიდი წელია არის. მას ხელშეკრულება ქუთაისის მე-2 და მე-3 საჯარო სკოლებთან აქვს გაფორმებული. თუმცა, გამოწვეული ზარალის მიუხედავად ის ახალ კონკურსში მონაწილეობას ისევ გეგმავს.

„პეჩენია, კამფეტი, გაზიანი სასმელები შემქონდა. ახლა ეს ყველაფერი აიკრძალა, რაც, რა თქმა უნდა, დაგვაზარალებს“, - ამბობს კახა მეფარიშვილი.

 

ბუფეტი ქუთაისის 38-ივე საჯარო სკოლაშია გახსნილი. იქ არსებულ სურსათის ვარგისიანობას სურსათის  ეროვნული სააგენტო ამოწმებს.  მიმდინარე წლის იანვრიდან დღემდე სააგენტომ მონიტორინგი ქუთაისის 30 სკოლაში განხორციელა. დანარჩენ სკოლებში კი  შემოწმება ახლაც მიმდინარეობს. სურსათის ეროვნული სააგენტოს იმერეთის რეგიონული სამმართველოდან მიღებული საჯარო ინფორმაციის მიხედვით, ქუთაისის  ერთი საჯარო სკოლის ბუფეტში კრიტიკული შეუსაბამობა დაფიქსირდა, რის გამოც ბუფეტი დაიხურა.

თავდახურული კონტეინერების არარსებობა მზა პროდუქციის განსათავსებლად, მზა პროდუქტი არ არის მარკირებული, სათანადოდ არ ხდება არაერთგვაროვანი პროდუქციის გამიჯვნა, საჯარო სკოლის ბუფეტების უმეტეს ნაწილში გასანათებელი მოწყობილობა არ არის დაფარული დამცავი ფარით (ე.წ. პლაფონით) - ეს  ის დარღვევებია, რომელიც   ქუთაისის საჯარო სკოლის ბუფეტებში სურსათის ეროვნული სააგენტოს მონიტორინგის შედეგად გამოკვეთილი ტიპური დარღვევები ასე გამოიყურება.

სურსათის ეროვნული სააგენტოს იმერეთის რეგიონული სამმართველო ქუთაისის საჯარო სკოლებში მონიტორინგს 2014 წლიდან ახორციელებს. ახალი ინიციატივის ფარგლებში, სამინისტრო სტუდენტების ჩართულობით, აქტიურ საკომუნიკაციო კამპანიას გეგმავს, რომელშიც სკოლის მოსწავლეები, კვების ექსპერტები და ცნობილი სახეები ჩაერთვებიან.