ქუთაისიპოსტი

ქუთაისის მერის და მისი თანამშრომლების მივლინებისთვის გასულ წელს 105  096,98 ლარი დაიხარჯა.

აქედან, 95 534,  98 ლარი ქვეყნის გარეთ, ხოლო დანარჩენი ქვეყნის შიგნით სამივლინებო ვიზიტებისთვის გაიცა.

ბელარუსიის რესპუბლიკა, ბელგიის სამეფო, გერმანია, ესპანეთის სამეფო, ესტონეთის რესპუბლიკა, ირანის ისამური რესპუბლიკა, ისრაელი, ლატვიის
რესპუბლიკა, მოლდოვას რესპუბლიკა, ნიდერლანდების სამეფო, პოლონეთის რესპუბლიკა, პორტუგალია, რუსეთი, საფრანგეთი - ეს იმ ქვეყნების ჩამონათვლია, სადაც გასული წლის განმავლობაში ქალაქის მერი, მისი მოადგილეები და სხვა თანამშრომლები სამივლინებო ვიზიტით იმყოფებოდნენ.

ბათუმი, თბილისი, ანაკლია, ამბროლაური, ბორჯომი, ბაკურიანი, გურჯაანი, ზუგდიდი, თელავი, ურეკი, კაჭრეთი, მცხეთა და ქობულეთი - ეს კი ის ქალაქებია, სადაც გასულ წელს ადგილობრივი თვითმმართველობის წარმომადგენლები იმყოფებოდნენ.

მერიის მიერ მოწოდებული ინფორმაციით, 2016 წელს ქალაქის მერმა, საზღვარგარეთ სულ 4 ვიზიტი - აზერბაიჯანში, სლოვენიაში, გერმანიასა და ჩინეთში განახორციელა.

შოთა მურღულია გასული წლის ბოლოს მივლინებით (19-21 დეკემბერს) აზერბაიჯანში, კერძოდ, განჯაში საერთაშორისო ღვინის ფესტივალზე იმყოფებოდა, რომელსაც მსოფლიოს სხვადასხვა ქვეყნის ღვინის მწარმოებელი კომპანიები ესწრებოდნენ.

2016 წლის განმავლობაში ყველაზე დიდი თანხა გერმანაში, ქალაქ ბერლინში, 8-14 მარტს მერიის სამი თანამშრომლის (მერიის ქონების მართვის სამსახურის უფროსის მოადგილე, ტურიზმის განყოფილების ორი სპეციალისტის) სამივლინებო ვიზიტი დაჯდა.

მერიიდან მოწოდებული ინფორმაციით, ადგილობრივი თვითმმართველობის თანამშრომლები ბერლინში, საერთაშორისო გამოფენა-ბაზრობა "ITB2016" მონაწილეობდნენ.

ქალაქის მერი შოთა მურღულია ქუთაისიპოსტის მიცემულ ინტერვიუში განმარტვას, რომ მას მივლინებებისთვის ბევრი დრო არ რჩება.

"მე ბევრი დრო არ მაქვს, რომ მივლინებებში ვიარო. ალბათ, ეს უნდა შეიცვალოს და მერი უფრო მეტად საგარეო თემებზე უნდა იყოს გადართული და არა ყოველდღე ობიექტების სამუშაოებზე თავზე დგომით", - ამბობს ის ინტერვიუში.




ამავე თემაზე :

ქუთაისის საკრებულოში 2016 წელს მივლინებისთვის 29 980,98 ლარი დაიხარჯა

იმერეთის გუბერნიის 30 157 ლარიანი მივლინებები და მათი შედეგები