"მშიერი ჭიათურა ვერ მოიცდის" - მაღაროელები 15 მარტს მასშტაბურ აქციას აანონსებენ

12:51 / 11.03.2025

შემოსავლის გარეშე დარჩენილი ჭიათურელი მაღაროელები, 15 მარტს, კომპანია "ჯორჯიან მანაგანეზის" წინააღმდეგ საპროტესტო აქციას გამართავენ.

ჭიათურელები, ქალაქის ცენტრში ელოდებიან ყველას, ვინც მშრომელებს სოლიდარობას უცხადებს. აქციის მთავარი მოთხოვნა ჭიათურიდან მადნის მომპოვებელი კომპანიის გასვლა და მაღაროების სახელმწიფოს მართვაში გადასვლაა.

პროტესტის საინიციატივო ჯგუფის წევრის, ტარიელ მიქაცაძის თქმით, "ჯორჯიან მანგანეზმა" ათასობით ოჯახი მშიერი დატოვა, რასაც ქალაქი ვერ მოითმენს.

"მშიერი ჭიათურა ვერ მოიცდის. მთავრობას აქვს ბევრი ბერკეტი, რომ აიძულოს კომპანია გააკეთოს ის, რაც ევალება და არ დატოვოს ქალაქი ულუკმაპუროდ. პირდაპირ ვავალებთ მთავრობას, რომ ეს პრობლემა მოაგვაროს თვითონ, აიღოს პასუხისმგებლობა. ჩავერთვებით ჩვენც, როგორც მუშათა კლასი ამ პრობლემის გამოსწორებაში, მართვაში. სხვა გზა ჩვენ არ გვაქვს. უნდა მოვთხოვოთ მთავრობას, რომ ეს გააკეთოს. ჭიათურა არის უკიდურეს მდგომარეობაში ახლა", - ამბობს ტარიელ მიქაცაძე.

ჭიათურაში საპროტესტო გამოსვლები 28 თებერვლიდან დაიწყო. მაღაროელები, გასული თვის, ამ დრომდე გაუცემელ ხელფასს და მადნის მომპოვებელ საწარმოებში, ოთხი თვის წინ შეწყვეტილი მუშაობის აღდგენას ითხოვდნენ. "ჯორჯიან მანგანეზი" თანამშრომელთა პროტესტს მეექვსე დღეს გამოეხმაურა და ვრცელი განცხადება გამოაქვეყნა, სადაც წერდა, რომ კომპანიაში მძიმე ფინანსური კრიზისია, რაშიც ბრალი თავად მაღაროელებს და სოფელ შუქრუთის მცხოვრებლებს მიუძღვით, რომლებსაც კომპენსაციის მიღების მიზნით, ერთი წელია მაღაროების ნაწილი აქვთ პიკეტირებული. კომპანიის მომდევნო განცხადება კი გასული წლის პირველი ნოემბრიდან გაჩერებული მაღაროების საბოლოოდ დახურვას უკავშირდებოდა. "ჯორჯიან მანგანეზის" ეს გადაწყვეტილება, 3500-ზე მეტი მაღაროელის და მათი ოჯახების შემოსავლის გარეშე დატოვებას ნიშნავს. სწორედ ამიტომ, მაღაროელები პროცესში სახელმწიფოს ჩართვას ითხოვენ.

"2019 წლიდან დღემდე, მეხუთე პროტესტია და ფაქტობრივად, ყოველ ჯერზე გვატყუებს კომპანია; ყოველ წელიწადს გვტოვებს მშიერს, ბანკის ვალების ქვეშ. ამიტომ, ჩვენი მთავარი მოთხოვნაა კომპანიის გასვლა ქალაქიდან. მას უნდა მაღაროები დახუროს და ღია კარიერული წესით მოპოვება გაასამმაგოს, გააოთხმაგოს. ბოლო ოთხი თვის მონაცემებით, კოოპერატივების ხელით, დაახლოებით 70 000 ტონა მანგანუმი მოიპოვა, გარეცხა და გაზიდა ქალაქიდან. ნახა, რომ ძალიან მარტივია ასე, არაფრის ფასად მანგანუმის მოპოვება. ჩვენ არ ვიცით როგორ გააფორმეს მათ მთავრობასთან კონტრაქტი 2006 წლის 19 დეკემბერს, მაგრამ როგორც ვიცით, კონტრაქტში წერია, რომ შესაძლებელია ჩასწორებები", - ამბობს ტარიელ მიქაცაძე.

პროტესტის მონაწილეებმა "ქართული ოცნების" მთავრობას რეაგირებისკენ აქციიდანაც რამდენჯერმე მოუწოდეს, თუმცა, უშედეგოდ. ჭიათურაში, მაღაროელებთან შესახვედრად არავინ ჩასულა. მშრომელებს არც "ქართული ოცნების" პრეზიდენტმა, მიხეილ ყაველაშვილმა უპასუხა, რომელსაც აქტივისტებმა წერილი გაუგზავნეს.

ჭიათურაში მეცამეტე დღეა საპროტესტო აქციები მიმდინარეობს. პარალელურად, ადგილობრივები ცდილობენ "ჯორჯიან მანგანეზს" ხელი შეუშალონ ქალაქიდან მანგანუმის გატანაში. მაღაროელებმა დააფიქსირეს კომპანიის სატვირთოებით ხე-ტყისა და ჯართის გატანის მცდელობა, რომელიც თავადვე აღკვეთეს.

ამავე თემაზე:

"გაგვაგებინონ რა ბედი ეწევა 3500 ადამიანს"- ჭიათურაში მაღაროელების პროტესტი გრძელდება

"ჯორჯიან მანგანეზი" ჭიათურის მაღაროებს ხურავს