"ჯორჯიან მანგანეზი" ჭიათურის მაღაროებს ხურავს

23:02 / 07.03.2025

ჭიათურელი მაღაროელების რვადღიანი პროტესტის პასუხად, "ჯორჯიან მანგანეზი" მადნის მომპოვებელ საწარმოებს ხურავს.

კომპანიის მიერ გავრცელებულ განცხადებაში ნათქვამია, რომ მიწისქვეშა სამუშაოები აღარ განახლდება. "ჯორჯიან მანგანეზის" ეს გადაწყვეტილება, შემოსავლის გარეშე ტოვებს 3500-ზე მეტ მაღაროელს და მათ ოჯახებს. მშრომელები, რომლებიც ოთხ თვეზე მეტია მაღაროებში სამუშაოების განახლებას ელოდებოდნენ, სამსახურის გარეშე დარჩნენ.

"DMT--ის (გერმანული საკონსულტაციო კომპანია) დასკვნით დასტურდება, რომ მიწისქვეშა მოპოვება ფინანსურად წამგებიანია [...] "ჭიათურა მენეჯმენტ კომპანიმ", "ჯორჯიან მანგანეზთან" შეთანხმებით მიიღო გადაწყვეტილება, რომ ჭიათურაში მიწისქვეშა სამუშაოებს აღარ განაახლებს", - წერია განცხადებაში.

კომპანიის განცხადებას უკვე გამოეხმაურნენ მაღაროელები. მათი თქმით, "ჯორჯიან მანგანეზი" ახლა შეეცდება ქალაქიდან ტექნიკა გაიტანოს, რისი შესაძლებლობაც არ უნდა მიეცეს.

"ის ქონება, რაც ჩვენი შრომით არის შეძენილი, დარჩება ჭიათურელებს. უნდა დავაწესოთ მორიგეობა, რომ ერთი დეტალი, ერთი კილოგრამი რკინა, ტექნიკა, არაფერი გავიდეს ობიექტებიდან. უნდა გავუფრთხილდეთ ჩვენს მაღაროებს და არ უნდა გავძარცვოთ. ასევე, არ გაბედოს კომპანიამ, რომ რამე მოითხოვოს ჩვენგან. პირიქით, ჩვენ ვართ დაზარალებულები მათგან და აქეთ გვეკუთვნის კომპენსაცია. გელოდებით ყველას ხვალ დილით", - განაცხადა საინიციატივო ჯგუფის წევრმა, ტარიელ მიქაცაძემ.

მაღაროელები ასევე ამბობენ, რომ კომპანაის არ უნდა მისცენ საშუალება მადნის მოპოვება ღია კარიერული წესით გააგრძელოს.

ჭიათურაში რვა დღეა საპროტესტო აქციები მიმდინარეობს. მაღაროში დასაქმებულებს ქალაქის სხვა მცხოვრებლებიც უერთდებიან. მშრომელებმა უნდობლობა გამოუცხადეს ჭიათურაში მადნის მომპოვებელ კომპანიას "ჯორჯიან მანგანეზს" და ქალაქიდან მისი გასვლა მოითხოვეს.