ქუთაისიპოსტი

ჟურნალისტ მზია ამაღლობელის მიმართ, პატიმრობის გამოყენების შესახებ საჩივარი, ბათუმის საქალაქო სასამართლომ ქუთაისის სააპელაციოს ვადების  დარღვევით გაუგზავნა.

"კანონის თანახმად, ბათუმის საქალაქო სასამართლო ვალდებული იყო გაეგზავნა საჩივარი ქუთაისის სააპელაციო სასამართლოსთვის, რომელსაც ჰქონდა 72 საათი, რომ მიეღო გადაწყვეტილება სწორად იყო თუ არა აღკვეთის ღონისძიება გამოყენებული. ბათუმის საქალაქო სასამართლოს მხრიდან ეს სარჩელი გაიგზავნა ოთხი დღის დაგვიანებით და არა დაუყოვნებლივ. დღეს, დილის საათებში დაგვიდასტურეს, რომ დღეს ჩაბარდა მათ საჩივარი. ეს არის საპროცესო ვადების უხეში დარღვევა, რაც ადასტურებს, რომ ამ ეტაპზე მზია ამაღლობელი რჩება უკანონო პატიმრობაში და ეს ვადა, რომელიც გამოყენებული უნდა ყოფილიყო პატიმრობის გადახედვისთვის, დაირღვა სასამართლოს ქმედებით", - განაცხადა ნონა ქურდოვანიძემ.

"საიას" თავმჯდომარემ ასევე, ისაუბრა მთელ რიგ დარღვევებზე, რომლებიც დაფიქსირდა მზია ამაღლობელის დაკავებისა და მისთვის პატიმრობის შეფარდების პროცესში.

ნონა ქურდოვანიძის თქმით, მზია ამაღლობელის დაკავება უკანონო იყო, როგორც ადმინისტრაციული, ასევე, სისხლის სამართლის კოდექსის საფუძვლებით. "საიას" მიიჩნევს, რომ 11 იანვარს, ადმინისტრაციულ სამართალდარღვევათა კოდექსით ჟურნალისტის დაკავება პოლიციელის თვითნებური გადაწყვეტილება იყო და ამიტომ, ის ვერ იქნება კანონიერი. არასამთავრობო ორგანიზაცია დაკავების ოქმს 21 იანვარს გაასაჩივრებს.

რაც შეეხება სისხლის სამართლის კოდექსით დაკავებას, ნონა ქურდოვანიძის თქმით, ბათუმის პოლიციის უფროსი, ირაკლი დგებუაძე, რომელსაც ჟურნალისტმა მზია ამაღლობელმა სახეში ხელი გაარტყა, ამბობს, რომ მას აღენიშნებოდა სიწითლე და დარტყმის მომენტში იგრძნო ტკივილი. "საიას" თავმჯდომარე ამბობს, რომ მხოლოდ აღქმებით დადასტურებული ფიზიკური ტკივილი არ ჯდება თავდასხმის დეფინიციაში, რასაც პროკურატურა დაკავებულ ჟურნალისტს ედავება.

"ის მუხლი, რომელსაც ედავება პროკურატურა მზია ამაღლობელს, არ არის მუხლი, რომლითაც ის შეიძლება დაისაჯოს. 353-ე პრიმა მუხლი უნდა მოიცავდეს რამდენიმე ისეთ ელემენტს, რომელიც უნდა იყოს სახეზე. ეს არის თავდასხმა, რომელიც უნდა იყოს პირდაპირი განზრახვით და მისი მიზანი უნდა იყოს დაკავშირებული პოლიციის საქმიანობასთან. გაშლილი ხელი, რომელიც ირაკლი დგებუაძის სახეზე ხვდება, არ მოიცავს არცერთ ამ ელემენტს. როგორც თავად ირაკლი დგებუაძე განმარტავს, დარტყმის შემდეგ აღენიშნებოდა სიწითლე და განიცადა ტკივილი. მხოლოდ აღქმებით დადასტურებული ფიზიკური ტკივილი კი სასამართლო პრაქტიკის მიხედვით, თავდასხმის დეფინიციაში არ ჯდება", - განაცხადა ნონა ქურდოვანიძემ.

მან კიდევ ერთხელ ისაუბრა პოლიციის განყოფილებაში, ბათუმის პოლიციის უფროსის, ირაკლი დგებუაძის მიერ მზია ამაღლობელის მიმართ დამამცირებელ მოპყრობაზე და განაცხადა, რომ "საია" თვალს მიადევნებს სპეციალური საგამოძიებო სამსახურის მუშაობას ამ მიმართულებით.

"ბათუმელებისა" და "ნეტგაზეთის" დირექტორი მზია ამაღლობელი, პოლიციამ 11 და 12 იანვარს ორჯერ დააკავა თავდაპირველად, იგი 11 იანვარს, სტიკერების გაკვრის გამო, ადმინისტრაციული წესით დააკავეს და ხელწერილის საფუძველზე გაათავისუფლეს, განმეორებით კი მისი დაკავება 12 იანვარს, პოლიციელზე თავდასხმის მუხლით (სსკ 353¹) მოხდა, რაც რაც 4-დან 7 წლამდე პატიმრობას ითვალისწინებს.

2025 წლის 11 იანვარს, ბათუმში შეკრებილი აქტივისტები ატარებდნენ საპროტესტო აქციას და აკრავდნენ სტიკერებს წარწერით - "იფიცება საქართველო", რაც თავის მხრივ, დაკავშირებული იყო "ქართული ოცნების" მიერ პროევროპული კურსის შეცვლის გამო ქვეყანაში დაწყებულ პროტესტთან. 

14 იანვარს, ბათუმის საქალაქო სასამართლომ ჟურნალისტს წინასწარი პატიმრობა შეუფარდა.