ქუთაისიპოსტი

პრემიერ-მინისტრი ირაკლი კობახიძე შუქრუთში მცხოვრებლების პროტესტს გამოეხმაურა, რომლებიც ექვს თვეზე მეტია, ხელისუფლებისგან პროცესებში ჩართულობას ითხოვენ.

კობახიძე განმარტავს, რომ მოლაპარაკებების წარმოება კომპანიის საქმეა. მეტიც, ის ირწმუნება, რომ აქციის მონაწილეებს კომპანიისგან ათობით ათასი ლარის კომპენსაცია აქვს მიღებული.

„ჩვენ მოვიძიეთ ინფორმაცია ამ ადამიანებთან დაკავშირებით და ვინც არიან პროტესტის ორგანიზატორები, თითოეულ მათგანს ათობით ათასი ლარის კომპენსაცია აქვთ მიღებული კომპანიისგან. თუ რამე დამატებით არის საჭირო კომპანიისგან, ალბათ, მოლაპარაკებები ამასთან დაკავშირებით წარიმართება. ეს არის ის ინფორმაცია, რაც გვაქვს დღემდე. კომპანიის საქმეა მოლაპარაკებების წარმოება“, - განაცხადა ირაკლი კობახიძემ შუქრუთის მოსახლეობის პროტესტთან დაკავშირებული კითხვის საპასუხოდ.

პროტესტის მონაწილე გიორგი ნეფარიძე კი პრემიერს მოუწოდებს, შეხვდეს მათ, მოუსმინოს და არ დაეყრდნოს მხოლოდ კომპანიის მიერ მიწოდებულ ინფორმაციას.

"ბატონი პრემიერი დაეყრდნო მხოლოდ და მხოლოდ "ჯორჯიან მანგანეზის" მიერ მიწოდებულ ინფორმაციას. ჩვენ ამიტომაც ვითხოვთ, რომ სამი მხარე დავსხდეთ მოლაპარაკების მაგიდასთან: კომპანია, დაზარალებული სოფლის მოსახლეობა და სახელმწიფო. იქ გამოიტანენ შესაბამის დასკვნებს ცენტრალური მთავრობის წარმომადგენლები, ორივე მხარიდან მიწოდებული ინფორმაციებისა და დოკუმენტაციების შესაბამისად",- ამბობს გიორგი ნეფარიძე. 

შუქრუთში მცხოვრებლების ნაწილი მესამე დღეა, პარლამენტთან აქციას მართავს. მათმა პროტესტმა თბილისში მას შემდეგ გადმოინაცვლა, რაც სოფელში გამართული აქციების მიუხედავად, მოთხოვნები არ დაუკმაყოფილეს. ისინი უკვე 13 დღეა შიმშილობენ. 5 მათგანს პირი აქვს ამოკერილი.



მოსახლეობა ამბობს, რომ "ჯორჯიან მანგანეზის” მიერ ჩატარებული სამუშაოების შედეგად დაინგრა მათი სახლები, დაზიანდა ნიადაგი, ეზოები და ნაკვეთები. სოფელი, ფაქტობრივად, საცხოვრებლად გაუსაძლისი გახდა. ამიტომ, მოითხოვენ ,,ჯორჯიან მანგანეზისგან” ზიანის ადეკვატურ ანაზღაურებას, ამ პროცესებში კი ცენტრალური ხელისუფლების ჩართვას.

"ჯორჯიან მანგანეზში" კი ამბობენ, რომ ადამიანებს, რომელიც კომპანიას მოთხოვნებს უყენებენ, კომპენსაცია უკვე აღებული აქვს და თანხები კერძო საკუთრების ინდივიდუალური შეფასების მიხედვით, სხვადასხვა წლებში ეტაპობრივად გაიცა. ამასთან, კომპანია, ნაცვლად პრობლემების მოგვარებისა, სოფელ შუქრუთში მცხოვრებ იმ ადამიანებს უჩივის, რომლებსაც კომპანიის საქმიანობის შედეგად საცხოვრებელი სახლები ენგრევათ.

შუქრუთელების მდგომარეობა, მედიასაშუალებების გარდა, ამ დრომდე არავის მოუკითხავს, არც ადგილობრივი და ცენტრალური ხელისუფლებიდან, არც გუბერნიის ადმინისტრაციიდან და არც სახალხო დამცველის აპარატიდან. მათ შორის არც რუსულ კანონზე ხელმომწერ, საჩხერის, ჭიათურისა და ხარაგაულის მაჟორიტარ დეპუტატ პაატა კვიჟინაძეს.

სოფელ შუქრუთის მცხოვრებლები, კომპენსაციის მიღების მოთხოვნით, ქუჩაში, 3 წლის წინაც გამოვიდნენ. მაშინ მათ პროტესტის უკიდურეს ფორმას მიმართეს და პირიც ამოიკერეს.

მოსახლეობასა და კომპანია „ჯორჯიან მანგანეზს“ შორის შეთანხმება 220 დღიანი პროტესტის შემდეგ შედგა.

"ჯორჯიან მანგანეზმა" 2021 წლის 16 მაისს განაცხადა, რომ საინჟინრო კვლევების საფუძველზე, სოფელში, 36 ოჯახი ჯამში 2 300 000 ლარის კომპენსაციას მიიღებდა.

შპს "ჯორჯიან მანგანეზი" ჭიათურა-საჩხერის მუნიციპალიტეტში მანგანუმის მადნის სამთო მოპოვების ლიცენზიის მესაკუთრეა. ის მოპოვებით საქმიანობას ჭიათურის მთლიან ტერიტორიაზე (16 430 ჰექტარზე) ახდენს.