ქუთაისიპოსტი

რუსული კანონის ფარგლებში „უცხოური ძალის ინტერესების გამტარებელ“ ორგანიზაციათა რეესტრში დასარეგისტრირებლად სამინისტროს 233-მა ორგანიზაციამ მიმართა.

ამის შესახებ იუსტიციის მინისტრის პირველმა მოადგილემ თამარ ტყეშელაშვილმა დღეს, 30 აგვისტოს, საკონსტიტუციო სასამართლოში განაცხადა, სადაც რუსული კანონის წინააღმდეგ საკონსტიტუციო სარჩელის განხილვა მიმდინარეობს.

„ამ დრომდე, ამ წუთის მონაცემებით, საჯარო რეესტრის ეროვნულ სააგენტოში რეგისტრაციის მიზნებისთვის 233 ორგანიზაციას აქვს განცხადებით მომართული. კიდევ არის ვადა“, – განაცხადა თამარ ტყეშელაშვილმა.

ამავე პროცესზე, საჯარო რეესტრის ეროვნული სააგენტოს თავმჯდომარემ, დავით დევიძემ განაცხადა, რომ, დღეის მდგომარეობით, საქართველოში რეგისტრირებულია 31 233 არასამეწარმეო იურიდიული პირი ანუ არასამთავრობო ორგანიზაცია, საიდანაც 564 სახელმწიფოს დარეგისტრირებულია, 733 კი სავარაუდოდ სპორტული ფედერაცია. სახელმწიფოს მიერ დაფუძნებულ ორგანიზაციებსა და ფედერაციებს რუსული კანონი არ ეხებათ. შესაბამისად, გამოდის, რომ „უცხოური ძალის ინტერესების გამტარებელ“ ორგანიზაციათა რეესტრში რეგისტრაცია ამ დრომდე ორგანიზაციათა, დაახლოებით, 0.77%-მა მოითხოვა.

"უცხოური გავლენის გამჭვირვალობის შესახებ“ კანონპროექტი „ქართულმა ოცნებამ“ 2024 წლის 3 აპრილს მეორედ დააინიცირა. 14 მაისს კი, ხალხმრავალი აქციებისა და საერთაშორისო კრიტიკის მიუხედავად, მესამე, საბოლოო მოსმენით მაინც მიიღო. 4 ივნისიდან კანონი ძალაშიც შევიდა.

2 აგვისტოდან ორგანიზაციები და მედიები, რომელთაც კანონი უცხოური ძალის ინტერესების გამტარებად მონიშნავს, ვალდებულები ხდებიან, დარეგისტრირდნენ ე.წ. რეესტრში. მათ საამისოდ ერთი თვე აქვთ. თუკი ორგანიზაცია არ დარეგისტრირდება, კანონის დაუმორჩილებლობისთვის გათვალისწინებული ჯარიმები 5 000 ლარიდან 25 000 ლარამდე მერყეობს.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

რუსულ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგებოდა და დღემდე ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.

კანონპროექტი, 2023 წლის მარტში, მოსახლეობის პროტესტის შედეგად "ქართულმა ოცნებამ" უკან გაიწვია. მაშინდელმა პრემიერ-მინისტრმა ირაკლი ღარიბაშვილმა და უმრავლესობის წარმომადგენელმა ირაკლი კობახიძემ პირობა დადო, რომ ამ მას აღარასოდეს მიუბრუნდებოდნენ.