ქუთაისიპოსტი

იმერეთში ყველა საარჩევნო უბანი 20:00 საათზე დაიხურა.

ცესკოს 17:00 საათის მონაცემებით, იმერეთში ყველაზე მაღალი აქტივობა 57.19% (11 426 ამომრჩეველი) ხარაგაულში გამოვლინდა, ხოლო ყველაზე ცოტა ამომრჩეველი საარჩევნო უბნებზე ქუთაისში მივიდა - 41.6% (64 984 ამომრჩეველი).

ამომრჩევლის აქტივობის მაჩვენებლები დანარჩენ ათ მუნიციპალიტეტში ასე გამოიყურებ:
თერჯოლა - 17 873 – 52,7%
ბაღდათი - 11 555 – 52,5%
ვანი - 13 135 – 52,2%
ჭიათურა - 19 375 – 44,9%
სამტრედია - 22 794 – 49,3%
ხონი - 13 032 – 56,1%
ტყიბული - 11 116 – 51%
წყალტუბო - 24 951 – 48,6%
საჩხერე - 24 250 – 57,2%
ზესტაფონი - 26 763 – 48,4%

იმერეთის 11 მუნიციპალიტეტში ამ დროისთვის 18 საჩივარია დაწერილი. ყველაზე მეტი, ხუთი განცხადება ზესტაფონის საოლქო საარჩევნო კომისიაში შევიდა. აქედან სამი შეეხება ხმის მიცემის პროცედურების დარღვევას.

„ინტიტუციური განვითარებისა და მონიტორინგის ცენტრის“ დამკვირვებლებმა დარღვევები გამოავლინეს N34–ე, N10–ე და N2–ე უბნებზე, სადაც საჩივარი ფუნქციების გადასანაწილებლად კენჭისყრის პროცესის დარღვევას ეხება.

საჩივრები დაიწერა ბაღდათშიც. „საქართველოს ახალგაზრდა იურისტთა ასოციაციის“ განცხადებების მიხედვით, N4 საარჩევნო უბანზე კომისიის წევრმა უარი განაცხადა გადასატანი ყუთის თანმხლები პირების ასარჩევად კენჭისყრაში მონაწილეობაზე.

წილისყრით ფუნქციების განაწილების პროცედურისა და კენჭისყრის ფარულობის დარღვევის შესახებ საჩივარი დაიწერა თერჯოლაში, სამტრედიასა და საჩხერეში.
ხონის, N1 უბანზე „ნაციონალური მოძრაობის“ დამკვირვებელის მიერ შედგენილი საჩივრის მიხედვით, კომისიის წევრმა ამომრჩეველი აიძულა შემოხაზული ბიულეტენი ეჩვენებინა.

ჭიათურაში მარკირებაგავლილი ამომრჩევლის მიერ ხმის მიცემის ფაქტი გამოვლინდა. ტყიბულში კი კომისიის წევრმა ამომრჩეველს ბიულეტენი ხელმოწერის გარეშე გადასცა. ამავე ოლქში ამომრჩეველმა ხმა ვადაგასული პირადობით მისცა.

ორი საჩივარი დაწერეს წყალტუბოში „ახალგაზრდა იურისტთა ასოციაციისა“ და „სამართლიანი არჩევნების“ დამკვირვებლებმა. „სამართლიანი არჩევნების“ წარმომადგენელმა საოლქო საარჩევნო კომისიას მიმართა N 55–ე უბანზე არაუფლებამოსილი პირის ყოფნის თაობაზე, საიას საჩივრის მიხედვით კი N 54–ე უბანზე გადასატანი ყუთი დაულუქავი დაბრუნდა.

არც ერთი საჩივარი არ დაწერილა ხარაგაულსა და ვანში.