ქუთაისიპოსტი

ტყიბულის  მეორე სკოლაში სასწავლო პროცესი მშობლების პროტესტით დაიწყო. ისინი  საგაკვეთილო პროცესის მეორე ცვლაში გადატანას აპროტესტებენ. ამ მიზეზით,  სკოლაში დღეს 100 მოსწავლე საკლასო ოთახებში არ შევიდა.

სკოლას მეორე ცვლა მას შემდეგ დაემატა, რაც ექსპერიზის შედეგად  ორი დღის წინ გაირკვა, რომ მეორე საჯარო სკოლის შენობა ამორტიზებულია.  სწორედ ამ სასწავლო დაწესებულების მოსწავლეების  გადანაწილება მოხდა პირველ საჯარო სკოლაში. 

"გუშინ, 14 სექტემბერს დაგვიბარეს და გვითხრეს, რომ სხვა სკოლაში, სხვა ცვლაში გადაყავდათ ბავშვები და მათ შუადღით უნდა დაეწყოთ სწავლა. ტყიბულში გადაადგილება რთულია, მითუმეტეს ზამთარში, ყველანი ვმუშაობთ და ბავშვების ასეთი სასწავლო რეჟიმს ვერანაირად ვერ ავეწყობით," - ამბობს  ტყიბულის მეორე საჯარო სკოლის მშობელი ხათუნა დალაქიშვილი.

"სკოლის შენობა ნგრევადია, ამიტომ გადაგვიყვანეს სხვა სკოლაში სადაც, გრაფიკი არ გვაწყობს. გადაგვიყავნეს პირველ საჯარო სკოლაში, სადაც არ არის საკმარისი ოთახები. ამიტომაც გადაუწიეს ბავშვებს ორ საათამდე სწავლის დაწყება. ჩვენ ამას არ შევეგუებით. გამოგვიყონ ფართი სადაც უნდათ, მთავარია ბავშვებმა პირველ სმენაში ისწავლონ, წინააღმდეგ შემთხვევაში, შვილებს სკოლაში არ გავუშვებთ და საერთოდ გაუქმდება ეს სკოლა," - ამბობს მშობელი მაკა მარგველაშვილი.

ტყიბულის #2- ე საჯარო სკოლის დირექტორი, მეგი ქათამაძე აცხადებს, რომ მისთვის გასაგებია მოსწავლეებისა და მათი მშობლების პროტესტი, ამიტომ დირექცია ალტერნატიული ფართს ეძებს.

"ჩვენ ოთხი დღით ადრე გავიგეთ სამხარაულის ექსპერტიზის დასკვნა იმის შესახებ, რომ #2-ე სკოლის შენობა ამორტიზებულია. ამიტომ არ მოგვეცა დრო სხვანაირად დაგვეჭირა თადარიგი. ბავშვების მეორე სმენაში და სხვა სკოლაში გადაყვანაც იმიტომ გადავწყვიტეთ, რომ სასწავლო პროცესი არ შეწყვეტილიყო," - ამბობს მეგი ქათამაძე.

მისივე თქმით, სკოლის ადმინისტრაციას, გამგეობის და საგანამანათლებლო რესურსცენტრის წარმომადგენლებთან ერთად უკვე დაწყებული აქვს მუშაობა ალტერნატიული ფართის მოძიებაზე.

ტყიბულის გამგეობის პრესსამსახურში აცხადებენ, რომ მათ მიიღეს წერილობითი განცხადება, საგანმანათლებლო რესურსცენტრიდან ალტერნატიული ფართის გამოყოფის თაობაზე, თუმცა მუნიციპალიტეტში ასეთი ფართის არ არსებობის გამო,  მოთხოვნის დაკმაყოფილება ვერ მოხდა.

"მუნიციპალიტეტში არ არსებობს ისეთი ფართი, სადაც ამ მოსწავლეების გადაყვანა მოხერხდებოდა,"- ამბობს ტყიბულის მუნიციპალიტეტის გამგეობის პრესსამსახურის თანამშრომელი ელისო ჭანტურიძე.

ტყიბულის საგანმანათლებლო რესურცენტრში კი აცხადებენ, რომ ისინი აქტიურად მუშაოებენ #2 -ე საჯარო სკოლაში არსებული პრობლემის გადასაწყვეტად.თუმცა, ამ დრომდე რატომ არ მოხდა ალეტრნატიული ფართის მოძიება ამას არ აკონკრეტებს. 

"თუ ბავშვებს სკოლაში არ გაუშვებენ მშობლები ეს მათი უფლებაა, თუმცა სკოლაში ორი ბავშვიც რომ მოვიდეს, სკოლა მაინც იფუნქციონირებს. ამ ეტაპზე ჩვენ არ გვქონდა დრო სხვაგვარად გადაგვეწყვიტა პრობლემა, ახლა კი ვმუშაობთ იმისთვის, რომ რაიმე გზა გამოვძებნოთ და ბავშვებმა პირველ სმენაში და ალტერნატიულ ფართში გააგრძელონ სწავლა,"- აცხადებს ტყიბულის საგანმანათლებლო რესურსენტრის ხელმძღვანელი ირინე კორძაია.

სსიპ საგანმანათლებლო სამეცნიერო ინფრასტრუქტურის განვითარების სააგენტოში, "ქუთაისიპოსტს" განუცხადეს, რომ ტყიბულის #2- ე საჯარო სკოლის შენობაზე წერილობითი ინფორმაცია მიმდინარე წლის 10 ივლისს გადაეგზავნა განათლებისა და მეცნიერების სამინისტროს.
"წერილში ნათქვამია, რომ შენობა არის სასწავლო პროცესისთვის არარენტაბელური,"- ამბობს სსიპ საგანმანათლებლო სამეცნიერო ინფრასტრუქტურის განვითარების სააგენტოს საზოგადოებასთან ურთიერთობის სამსახურის ხელმძღვანელი, თამუნა მინდიაშვილი.

როდის გადაეგზავნა ტყიბულის #2-ე საჯარო სკოლას განათლებისა და მეცნიერების სამინისტროდან წერილი, ამის შესახებ ინფორმაციას უწყებიდან პასუხის მიღებისთანავე მოგაწვდით.

ტყიბულის #2-ე საჯარო სკოლაში დღეის მონაცემებით სულ 119 მოსწავლე სწავლობს.