ქუთაისიპოსტი

ქუთაისში აღაშენებლის მოედანზე მშენებარე "McDonald’s"-ის ახალი რესტორნის საპრივატიზებო თანხიდან ადგილობრივ ბიუჯეტში ერთი ლარიც არ ირიცხება.
სწრაფი კვების ობიექტის მშენებლობისთვის ხელშეკრულება ეკონომიკის სამინისტროსა და შპს "თ და კ რესტორნებს" შორის გაფორმდა.

უწყებაში განგვიმარტეს, რომ 885 000 ლარი, რომელიც კომპანიამ ქუთაისში ცენტრალურ მოედანზე 1416 კვ.მ ფართში გადაიხადა, მთლიანად ცენტრალურ ბიუჯეტში გადაირიცხება.

ხელშეკრულების თანახმად, კომპანიამ ის წინასწარ შედგენილი გრაფიკის მიხედვით უნდა გადაიხადოს. კერძოდ:  2016 წლის 30 ნოემბრისთვის უნდა გადაეხადა არანაკლებ 150 000 ლარისა, 2017 წლის 30 სექტემბრისთვის - 245 000 ლარი, 2018 წლის 28 თებერვლისთვის - 245 000 ლარი და 2018 წლის 30 ივლისისთვის - 245 000 ლარი.

ხელშკრულების მიხედვით, "McDonald’s"-ის ვალდებულებები 11 პუნქტისგან შედგება. აქედან, პირველი სამი მშენებლობის ვადას, ინვესტიციას და დასაქმებას ეხება, დანარჩენი კი სამუშაოების მიმდინარეობის შესახებ აუდიტორული დასკვნის წარდგენას და სამინისტროსთვის ინფორმაციის მიწოდებას ითვალისწინებს.

ეკონომიკის სამინისტროში განმარტავენ, რომ საპრივატიზებო თანხის გარდა, საინვესტიციო თანხა 2 800 000 ლარს შეადგენს, რაც "McDonald’s"-ის სწრაფი კვების ობიექტის აშენებას და მის აღჭურვას უნდა მოხმარდეს.

მხარეებს შორის დადებული ხელშეკრულებიდან ირკვევა, რომ მშენებლობა ამ დოკუმენტზე ხელისმოწერიდან 18 თვის განმავლობაში უნდა დასრულდეს. გამოდის, რომ ქუთაისის ცენტრალურ მოედანზე "McDonald’s"-ის ახალი რესტორანი 2018 წლის ივნისში დასრულდება.

რაც შეეხება დასაქმებას, კომპანია ვალდებულია სწარფი კვების რესტორანში, არანაკლებ ერთი წლის ვადით, 40 ადამიანი დაასაქმოს.

გაეცანით ამავე თემაზე ქუთაისიპოსტის მიერ მომზადებულ მასალებს:

"მაკდონალდსის" შესრულებული და შეუსრულებელი ვალდებულებები ქუთაისში