ქუთაისიპოსტი

ამ დრომდე გადაწყეტილი არ არის რამდენი დელეგაცია  წავა ოფიციალური თბილისიდან უკრაინაში.
პარლამენტის თავმჯდომარე შალვა პაპუაშვილმა ბიუროს დღევანდელ სხდომაზე განაცხადა, რომ უკრაინაში ვიზიტი, დიდი ალბათობით, უახლოეს დღეებში შედგება. შალვა პაპუაშვილმა ოპოზიციის წარმომადგენლებს მიმართა, რომ  დროულად მიაწოდონ საკუთარი კანდიდატები, რომლებიც დელეგაციასთან ერთად უკრაინაში გაემგზავრებიან.

"ჩემი სურვილი იყო, რომ პარლამენტის თავმჯდომარის დელეგაცია ყოფილიყო მრავალპარტიული, გუშინ გვქონდა საუბარი ოპოზიციის წარმომადგენლებთან, მქონდა შეთავაზება რომ თანაბარი წარმომადგენლობა ყოფილიყო, თუმცა არ იყო თანხმობა და შემდეგ კვლავ შევთავაზეთ, რომ თითო პოლიტიკური ჯგუფიდან წარმომადგენელი იყოს. მართალია, ამ შემთხვევაში უმრავლესობამ თანხმობა განაცხადა, რომ თავის მხრივ, არ გაზარდოს წარმომადგენლობა, თანაბრობის პრინციპი ამ შემთხვევაში დაირღვევა და ოპოზიციური უმრავლესობის დელეგაცია იქნება, თუმცა გამომდინარე ვითარებიდან ეს შეთავაზება ვფიქრობ, სწორი იყო და აქედან გამომდინარე, მე თხოვნა მექნება ოპოზიციის წარმომადგენლების მიმართ, რომ დროულად მოგვაწოდონ საკუთარი კანდიდატები დელეგაციისთვის.

ამ დელეგაციისთვის მე ყველა პოლიტიკურ ჯგუფთან მექნება კომუნიკაცია, ვინაიდან ორგანიზაციულად გვესმის, რომ არ არის მარტივი ვიზიტის ორგანიზება, არის საკმაოდ საჩქარო საკითხი და მე იმედი მაქვს, რომ დღის პირველ ნახევარში ეს საკითხი უნდა გავარკვიოთ და ველი ყველა პოლიტიკური ჯგუფის მონაწილეობას“, - განაცხადა პაპუაშვილმა.

გუშინ საღამოს, პარლამენტის თავმჯდომარის კაბინეტთან კონსულტაციების შედეგად მიღებული გადაწყვეტილებით, საუბარი იყო, რომ უკრაინაში პარლამენტიდან ორი დელეგაცია გაემგზავრებოდა - ცალკე პარლამენტის თავმჯდომარის და ცალკე საპარლამენტო დელეგაცია, რომლის შემადგენლობაშიც ოპოზიციური პარტიები შევიდოდნენ.

საქართველოს მთავრობაში უკრაინაში გამგზავრებაზე ფიქრი მას შემდეგ დაიწყეს, რაც უკრაინის უმაღლესი რადის სპიკერის რუსლან სტეფანჩუკისკან მიწვევა მიიღეს. 

უკრაინელმა დიპლომატმა ევროკავშირის პარლამენტებისა და G20-ის ქვეყნების პარლამენტის სპიკერები უკრაინაში მიიწვია. შესაბამისად, მიწვევა მიიღო შალვა პაპუაშვილმაც. მან თავდაპირველად თქვა, რომ მიწვევა მიღებული არ ქონდა, ხოლო შემდეგ მისმა კოლეგებმა განაცხადეს, რომ ის ავად იყო და უკრაინაში ჩასვლას ვერ შეძლებდა.

3 აპრილს გათავისუფლებულ ქალაქ ბუჩაში შესულ უკრაინელ სამხედროებს ქუჩებში დახოცილი, ხელფეხშეკრული და ნაწამები ადამიანების ცხედრები დახვდათ. უკრაინის გენერალური პროკურატურის მონაცემებით, ბუჩაში 410 ცხედარი იპოვეს.

უკრაინაში  50 დღეა ომია.

რუსეთი სუვერენულ უკრაინას თავს 24 თებერვალს დაესხა. უკრაინაში განადგურებულია ინფრასტრუქტურის მნიშვნელოვანი ნაწილი. რუსი ჯარისკაცები მოსახლეობას განსაკუთრებული სისასტიკით უსწორდებიან. უკრაინული მხარის ინფორმაციით, მხოლოდ ბუჩაში, რომელიც ოკუპანტების ალყაში იყო, 400-ზე მეტი ადამიანის ცხედარი იპოვეს. მათი უმრავლესობა დახვრეტილია ან წამებით არის მოკლული. რუსმა სამხედროებმა გააუპატიურეს ქალები და ბავშვები.

უკრაინა რუსეთის არმიის ქმედებებს "გენოციდს" უწოდებს.