ქუთაისიპოსტი

გიორგი ჭიღვარია ქუთაისის რიგით 23– ე  მერია.

მისი მერობის პირობებში წაართვეს ქუთაისს პარლამენტი, მას კი ამ საკითხზე კრიტიკული პოზიცია არასდროს დაუფიქსირებია.  გიორგი ჭიღვარიამ ვერც ტექნოლოგიური უნივერსიტეტის გახნა „ჩაიბარა“ და შესაბამისად, ვერც საგანმამანთლებლო ქალაქის მერი გახდა.

სამაგიეროდ, მისი მერობის დროს პირველად, ქუთაისი უწყვეტად მარაგდება სასმელი წყლით. დაიგო ათეულობით ქუჩა, მათ შორის ცენტრალური ქუჩები. გიორგი ჭიღვარიას მერობის დროს დასრულდა ასათიანის ქუჩის რეაბილიტაცია, რომელიც ჯერ კიდევ  წინა მერის, შოთა მურღულიას დროს დაიწყო და  ორ წელზე მეტხანს გრძელდებოდა. მოეწყო სკეიტ პარკი, რომელსაც ახალგაზრდები წლების განმავლობაში ითხოვდნენ,  უფასო გახდა სწავლა მერიის საგანმანათლებლო და სპორტულ დაწესებულებათა აიპებში. გიორგი ჭიღვარიას დროს აიკრძალა გარევაჭრობა და მისი მერობის პირობებში გადაწყდა ქუთაისში მუნიციპალური ავტობუსების ჩამოყვანის საკითხი, რაც სექტემბერში უნდა განხორციელდეს.

ქუთაისის მერის ხელწერაა ისტორიული თეთრი ხიდი. ნახევარმილიონიანი პროექტი, რომლის ხარჯებიც მთლიანად ადგილობრივი ბიუჯეტიდან ანაზღაურდა, ერთ–ერთი მთავარი მოვლენაა, რითიც ქუთაისის მერი ადგილობრივებს დაამახსოვრდებათ. თავად ქალაქის მერს კი, ალბათ, ის უმწვავესი კრიტიკა არ დაავიწყდება, რაც ქუთაისელებისგან ხიდის საბოლოო იერსახის გამო  მიიღო.

რეაბილიტირებული თეთი ხიდი

გიორგი ჭიღვარიამ ადგილობრივებს თავი ერთი შეხედვით მარტივი შეცდომებითაც დაამახსოვრა, რამაც მის იმიჯს საბოლოოდ  გამოუსწორებელი ზიანი მიაყენა. ყველაფერი კი 2018 წლის სექტემბერში, იტალიის ქალაქ კოზენცაში გამართული გამოფენით დაიწყო, სადაც ქართველი მხატვრების ნამუშევრებს შორის გიორგი ჭიღვარიას პორტრეტიც მოხვდა. ქალაქის მერის საგამოფენო დარბაზში ხილვა კრიტიკისა და ქილიკის მიზეზიც კი გახდა.


მალევე, გიორგი ჭიღვარიამ პირად გვერდზე გააზიარა ინფორმაცია ნიკო ნიკოლაძის სახელობის სკვერში თანამედროვე ტიპის სანათების დამონტაჟების შესახებ,  თუმცა, სინამდვილეში სკვერში არსებული ძეგლი ქუთაისელ მოქანდაკეს და ქართული ქანდაკების ფუძემდებელს, იაკობ ნიკოლაძეს ეკუთვნის.

გიორგი ჭიღვარია ისე წავიდა მერის პოსტიდან, რომ ორწლიანი მცდელობის მიუხედავად, ქუთაისის შემოსასვლელში დროშა ვერ აღმართა.

შელახული იმიჯის ფონზე ბევრჯერ გავრცელდა ინფორმაცია მისი პოსტიდან შესაძლო გადაყენების შესახებ, თუმცა, როგორც ჩანს, ყველა ჯერზე მას მმართველი პარტია კიდევ ერთ შანსს აძლევდა, ან რიგგარეშე არჩევნებს იცილებდა თავიდან.

საბოლოოდ,  გიორგი ჭიღვარიამ  ოფიციალური ინფორმაციის მიხედვით, მერის პოსტი პირადი განცხადების საფუძველზე დატოვა. იგი მეორე არჩეული მერია და პირველია, ვისაც უფლებამოსილება ვადაზე ადრე შეუწყდა.
იგივე განმეორდა რამდენიმე დღის წინ თერჯოლაში. თერჯოლის მერმა ბონდო სოფრომაძემ თანამდებობაზე უარი, ასევე, პირადი გადაწყვეტილებით თქვა. ეს ორი შემთხვევა   უბრალო დამთხვევის განცდას  ნამდვილად ტოვებს და პირიქით, მორიგი ცვლილებების მოლოდინს აჩენს.



ამავე თემაზე:

„გადავადებული" ქუთაისი

ქუთაისის „უჩინარი“ მერი – გიორგი ჭიღვარიას მუშაობის ერთი წელი