ქუთაისიპოსტი

სიტყვის თავისუფლება არის ბევრად უფრო მეტი, ვიდრე უფლება - ასე ფიქრობენ მოსწავლე-ახალგაზრდები “წიგნების თაობიდან”. 

მოსწავლეების მონაწილეობით “წიგნების თაობაში” გაიმართა იმ ლიტერატურული ნაწარმოებების წაკითხვა/განხილვა, რომლებიც სიტყვისა და გამოხატვის თავისუფლებას ეხება.

წიგნების თაობის პედაგოგებმა წაიკითხეს ძილისპირული ამბები მეამბოხე გოგონებისთვის, სადაც გაეცნენ რამდენიმე ისტორიას, ძლიერ შეუპოვარ გოგოებზე, რომელთა გამბედაობამ ელაპარაკათ და ემოქმედათ შეზღუდვების მოუხედავად, დიდი შედეგი მოიტანა.

მათ შორის იყო როზა პარქსი, რომელმაც დაიწყო ბრძოლა ამერიკაში თანაბარი უფლებებისთვის თეთრკანიან და ფერადკანიან ადამიანებს შორის; მალალა იუსაფზაი - ახალგაზრდა გოგო, რომელიც ტეროროსტებისგან დაშინების მიუხედავად, ხმამაღლა ამბობდა, რომ სწავლა გოგოებისთვის დიდი ძალაა და ტერორისტები ამაში ხელს უშლიან.

ასევე, ახალგაზრდებთან ერთად წაიკითხეს ამბავი ავღანელ რეპერ გოგოზე, სონიტა ალიზადეზე, რომელსაც ბავშვობის ასაკში გათხოვება(გაყიდვას) უპირებდნენ. ის ირანში გაიქცა დევნილად, შემდეგ კი ამერიკაში ჩავიდა და დაიწყო სიმღერების წერა ადრეული ქორწილების წინააღმდეგ.



“ახალგაზრდები თავისუფლებისთვის” - შეხვედრა/დისკუსიის ფარგლებში, წიგნების თაობის პედაგოგებმა მოსწავლეებთან ასევე, ისაუბრეს სიტყვისა და გამოხატვის თავისუფლებისთვის მებრძოლ კატო მიქელაძეზე, რომელიც საუკუნის წინ გაზეთის გამოცემით და ქალების არჩევნებში მონაწილეობის მოთხოვნით ხმას იმაღლებდა უსამართლობის წინააღმდეგ.

მოყვნენ ამბავი ჟურნალისტ ანა პოლიტკოვსკაიაზე, როგორც საუკეთესო მაგალითზე, თუ როგორ შეიძლება არ შეგეშინდეს სიტყვის თავისუფლების.

“ახალგაზრდები ბევრად უფრო სკეპტიკურად უყურებენ სამყაროს, ვიდრე უფროსი თაობის ადამიანები,” - აღნიშნა წიგნების თაობის მოსწავლემ, შეხვედრის დროს პროპაგანდასა და სიტყვის თავისუფლების შეზღუდვაზე საუბრისას.

“უნდა იყოთ სადარაჯოზე, იმიტომ, რომ ნელ-ნელა ხდება შემოპარვა შეზღუდვების” - ამბობს პედაგოგი მიხეილ მუმლაძე.