ქუთაისიპოსტი

ქუთაისის საკრებულოს წევრის, "რესპუბლიკელი" ნატო ქათამაძის მტკიცებით, ადგილობრივი თვითმმარველობის საკუთრებაში არსებულ ტერიტორიებს წინა მოწვევის საკრებულოს "ნაციონალი" დეპუტატები პირადი მიზნებისთვის ასხვისებდნენ. ქათამაძის მიერ დასახელებულ დეპუტატებს შორის ახალი მოწვევის საკრებულოს წევრის სახელიც ფიგურირებს.
"მწარე პრაქტიკაა წინა საკრებულოს დეპუტატების მიერ, რომლებიც თვითმართველობის საკუთრებაში არსებულ მიწებს ასხვისებდნენ, აიჯარებდნენ და გარკვეული პერიოდის შემდეგ ჩნდებოდა, რომ ამ მიწის მეპატრონეები თავადვე იყვნენ. მაგალითად, წინასწარი ინფორმაციით, კონკრეტული ფართების უკან დგას ქუთაისის საკრებულოს ყოფილი დეპუტატებიდან, ტატო მესხი, ანდრო ლოსაბერიძე და დავით გოგისვანიძე,"- ამბობს ქათამაძე.
მისივე თქმით, აღნიშნულის შესახებ მიმდინარეობს ინფორმაციის მოძიება, რომელიც მალე საჯარო გახდება.
"თუ რა კონკრეტულ ადგილებზეა საუბარი და საეროდ რა ხდებოდა ქალაქის საკუთრებაში არსებული მიწების გასხვისებასთან დაკავშირებით ბოლო ათი წლის მანძილზე, ამას სპეციალური ჯგუფი შეისწავლის და გამოიკვლევს,"- განმარტავს ნატო ქათამაძე.
საკრებულოს "ნაციონალი" დეპუტატი დავით გოგისვანიძე ქათამაძის ბრალდებებს უსაფუძლოს უწოდებს.
"თუ მიწების უკანონოდ გასხვისება ხდებოდა ქათამაძემ ფაქტებით უნდა ისაუბროს და სამართალდამცავ უწყებებს მიმართოს,"- ამბობს გოგისვანიძე.
ანა ჯანაშია