ქუთაისიპოსტი

“2 კვირაში საქართველოში ჩატარდება საპარლამენტო არჩევნები, 8 ოქტომბერს ქართველი ხალხი გაიმარჯვებს, ჩვენ კი თქვენთან ერთად დავიწყებთ ქვეყნის სწრაფ განვითარებაზე ზრუნვას, რათა თითოეულმა საქართველოს მოქალაქემ იგრძნოს კეთილდღეობა“.

ამ სიტყვებით მიმართა მორიგ შეხვედრაზე 70-ე ოლქის მაჟორიტარ კანდიდატმა საქართველოს პარლამენტში მუხრან ვახტანგაძემ პეტრე იბერის ქუჩის ამომრჩევლებს.

შეხვედრაზე მუხრან ვახტანგაძე ადგილობრივების პრობლემებს გაეცნო, პასუხები გასცა მათ მიერ დასმულ კითხვებს და შესაძლებლობის ფარგლებში ამომრჩევლებს დაპირდა არსებული სიტუაციის უკეთესობისკენ შეცვლას.

“ჩვენ საფუძველი ჩავუყარეთ წინსვლას და ახლა სწრაფი განვითარების დროა. არჩევნებში გამარჯვების შემდეგ, თითოეული მოქალაქის კეთილდღეობის უზრუნველსაყოფად, ვგეგმავთ განვახორციელოთ შემდეგი:

განათლება და მეცნიერება

• 2017 წლიდან დაინერგება ახალი სასკოლო პროგრამები და სახელმძღვანელოები;

• მასწავლებელთა საშუალო ხელფასი 2017 წლიდან 800 ლარზე მეტი გახდება;

• ამაღლდება მასწავლებლის პროფესიის პრესტიჟი, სასკოლო განათლების პროცესში

საკუთარ პროფესიებში წარმატებული ადამიანები ჩაერთვებიან;

• დაინერგება პროფესიული განათლების გერმანული მოდელი, გაჩნდება დასაქმების სათანადო შესაძლებლობა თითოეული კურსდამთავრებულისთვის;

• ახალ ტექნოლოგიურ უნივერსიტეტის გახსნით საქართველოში საერთაშორისო ხარისხის განათლების მიღება გახდება შესაძლებელი, რაც სტუდენტებს მთელი მსოფლიოდან მოიზიდავს;

• გამოყენებითი მეცნიერება ხელმისაწვდომი გახდება ყველა სამეწარმეო სუბიექტისა და ახალი იდეებისთვის. ამ მიზნით 42 კვლევითი ინსტიტუტი დამატებით 50 მილიონი ლარით დაფინანსდება.
სპორტი
• სახელმწიფო სპორტს კიდევ უფრო მეტად დააფინანსებს;

• დამტკიცდება მაღალმთიან დასახლებებში სპორტში დასაქმებული მწვრთნელებისთვის ფინანსური დახმარებისა და სპორტის განვითარების ხელშემწყობი სახელმწიფო პროგრამა;

• სათანადოდ მომზადებული პროფესიული კადრებით ქვეყნის უზრუნველსაყოფად განხორციელდება სპორტის უნივერსიტეტის რეფორმა;

• თელავში, გორში, რუსთავსა და ბათუმში აშენდება საერთაშორისო სტანდარტების ახალი სპორტის სასახლეები, თბილისსა და ქუთაისში კი - საერთაშორისო სტანდარტების ფეხბურთისა და რაგბის 20 ახალი კომბინირებული მოედანი;

• თბილისში ჭიდაობის სასახლე და სპორტსმენთა რეაბილიტაციის ცენტრი აშენდება; • ყველა მუნიციპალიტეტში მოეწყობა ღია სატრენაჟორო სივრცეები;

• მომდევნო 5 წლის განმავლობაში 265 მლნ ლარით დაფინანსდებიან საქართველოს ჩემპიონატში მონაწილე სხვადასხვა დონის საფეხბურთო გუნდები;

• ეროვნულ სპორტულ ფედერაციებთან კოორდინაციით შემუშავდება სპორტული ტურიზმის განვითარების სტრატეგია, რაც, ქვეყნის პოპულარიზაციასთან ერთად, არსებული სპორტული ინფრასტრუქტურის უფრო ეფექტიან გამოყენებას განაპირობებს.

შეხვედრას ასევე ესწრებოდა საქართველოს მე-8-ე მოწვევის პარლამენტის წევრი ნუკრი ქანთარია , რომელმაც ამომრჩევლებს პროგრამის სხვა მნიშვნელოვან მიმართულებებზე მიაწოდა ამომწურავი ინფორმაცია, რაც ქვეყნის განვითარებისათვის ერთობ მნიშვნელოვანია, კერძოდ: ჯანდაცვა და სოციალური უზრუნველყოფა, ეკონომიკა, ადამიანი და დემოკრატიული განვითარება.
თავისუფლება, სწრაფი განვითარება, კეთილდღეობა!