ქუთაისიპოსტი

ქუთაისში, სოციალურად დაუცველ და მრავალშვილიან ოჯახებს მოხალისეები ახალი წლის ღამეს საჩუქრებით ესტუმრებიან.

"ჩვენ ყველა გამოწვევის მიუხედავად, კვლავ ვაგრძელებთ თანხის და სხვა რესურსების შეგროვებას ინდივიდუალური შემომწირველებისა და კომპანიების დახმარებით, რათა სოციალურად დაუცველ, მრავალშვილიან ოჯახებს ახალი წლის ღამეს ვესტუმროთ და სიხარული მივანიჭოთ", - ამბობს RICDOG-ის გენერალური მდივანი და აქცია-ღონისძიების "ის მაინც არსებობს" ხელმძღვანელი ირაკლი თევზაძე.

"ის მაინც არსებობს" არის არასამთავრობო ორგანიზაცია RICDOG-ის ერთ-ერთი სოციალური ინიციატივა, რომელიც უკვე 14 წელია სოციალურად დაუცველ ოჯახებს ეხმარება. პროექტის მიზნად ისახავს სოციალურად დაუცველი, მრავალშვილიანი ოჯახების მხარდაჭერას. პროექტის ამოცანაა, უზრუნველყოს ისინი საბაზისო საჭიროებებით და იმედი მისცეს, რომ მიუხედავად სირთულეებისა, მათ გვერდით დგანან.

საქველმოქმედო კამპანიის ფარგლებში, მისი არსებობიდან დღემდე, "ის მაინც არსებობს "-ის დახმარება მიღებული აქვს 500-ზე მეტ ოჯახსა და 2500-მდე ბავშვს.

ყოველწლიურად, RICDOG-ის გუნდის წევრები და მოხალისეები აქტიურად მუშაობენ რესურსების მობილიზებაზე, კომპანიებთან კომუნიკაციაზე, ინდივიდუალური შემომწირეველებისგან შემოწირულობების მიღებაზე და ეფექტურ გადანაწილებაზე, რაც თითოეულ ბენეფიციარს მაქსიმალურ სარგებელს აძლევს.


"ჩვენ ვცდილობთ, გავაძლიეროთ ადამიანების სულიერი და ფსიქო-სოციალური კეთილდღეობა, რაც მათ ყოველდღიურ ცხოვრებაში ცვლილებებს მოიტანს. წელს პირველად, ოჯახების დახმარებასა და პატარების სურვილების ასრულებას, დაემატა საგანმანათლებლო პროგრამის სახით გრძელვადიანი ქველმოქმედების კომპონენტიც. დავიწყეთ ქრაუთფანდინგის კამპანია სწორედ ამ მიმართულებაზე ფოკუსირებული და ვგეგმავთ, რომ 100 ბავშვს 2025 წელს, მივცეთ შესაძლებლობა სრულიად უფასოდ მიიღონ მონაწილეობა საგანმანათლებლო, პიროვნული განვითარებისა და ინგლისურის სწავლების პროგრამაში.

ასევე, სიახლე არის ის რომ ჩვენ მოვამზადეთ განცხადება და სამწუხაროდ, ტრადიციული ღონისძიება, სადაც ყოველ წელს 100-ზე მეტი ადამიანი გვსტუმრობდა და იმართებოდა მათი მონაწილეობით, აუქციონი და კამპანიის შემაჯამებელი "საღამო" გავაუქმეთ, რადგან ქვეყანაში შექმნილია ასეთი მდგომარეობა, თუმცა ოჯახებს, რა თქმა უნდა, აუცილებლად დავეხმარებით", - ამბობს ირაკლი თევზაძე.

არასამთავრობო ორგაზაციაში ამბობენ, რომ მსგავსი პროექტები კრიტიკულად მნიშვნელოვანია, რადგან ისინი არა მხოლოდ მყისიერ დახმარებას სთავაზობენ საჭიროებაში მყოფ პირებს, არამედ საზოგადოებაში სოლიდარობის და თანადგომის განცდას აძლიერებენ.

"ასეთი ინიციატივები გვახსენებს, რომ ყველას აქვს უნარი, სხვებისთვის სასიკეთო ნაბიჯი გადადგას, რაც საბოლოოდ უფრო ჰუმანურ და ერთიან საზოგადოებას ქმნის. ვფიქრობ, რომ სამოქალაქო საზოგადოების ორგანიზაციები სწორედ ასეთ, მნიშვნელოვან საქმეს აკეთებენ ყოველწლიურად თუ ყოველდღიურად. შეიძლება ქველმოქმედების და ოჯახების დახმარების მიღმა, სსო-ების სამუშაო სფეროები ფარავენ ისეთ თემებს როგორებიცაა: ჯანდაცვის სერვისები, ევროინტეგრაცია, ადამიანის უფლებები, ახალგაზრდების განვითარების და დასაქმების ხელშეწყობა, ახალგაზრდული პოლიტიკა, განათლება, სპეციალური საჭიროების მქონე პირებისა და ბავშვებისთვის სასიცოცხლოდ მნიშვნელოვანი სერვისები და სხვა", - ამბობს დიანა აბულაძე, RICDOG-ის გენერალური მდივნის მოადგილე.

სწორედ, ასეთი მიზნების და ამოცანების განვითარებისათვის სასიცოცხლოდ მნიშვნელოვანია დემოკრატილ საზოგადოებაში და ამასთანავე დემოკრატიული საზოგადოებისათვის არსებობდეს ასეთი არასამთვრობო ორანიზაციები, რომელიც რეალურად აძლიერებენ სახელმწიფო ინსტიტუციების მუშობას.

"არასამთავრობო ორგანიზაციებს ჩვენის ქვეყნისთვის და საზოგადებისათვის აქვთ მნიშვენლობანი როლი. პირველი: ქმნიან აქტიურ და პასუხიმგბელიან მოქალაქეს, აწვდიან მათ უნარებს, ცოდნას და შესაძლებლობებს დაიცვან საკუთარი თავი და განხორციელონ საკუთარი ინტერსები და შემდეგ დაეხმარონ სამშობლოს, ქვეყანას, რომ სხვისი უფლებებიც იყოს დაცული“ - RICDOG-ის დამფუძნებელი ნუგზარ კოხრეიძე.