ქუთაისიპოსტი

ქუთაისში მოსახლეობა ქუთაისიდან თბილისისა და ბათუმის მიმართულებით სწრაფი მატარებლების დანიშვნას ითხოვს.

შესაბამისი მოთხოვნით პეტიციის ტექსტი მომზადდა, რომელსაც, სოციალურ ქსელში, გიდი და ტურისტული სააგენტო Travel To Georgia-ის დამფუძნებელი ლაშა ბერეკაშვილი ავრცელებს.

პეტიციის ინიციატორები მიიჩნევენ, რომ სწრაფი მატარებლების დანიშვნა გაზრდის ქუთაისის ტურისტულ და ეკონომიკურ მიმზიდველობას; წაახალისებს შიდა ტურიზმსა და ბიზნესს; შეამცირებს ქუთაისიდან სხვა ქალაქებში გადინებას; გააადვილებს მოქალაქეების გადაადგილებას დედაქალაქსა და შავი ზღვის რეგიონში; ქალაქს აქცევს რეგიონულ ლოგისტიკურ ცენტრად. ასევე, გააძლიერებს საგანმანათლებლო და სამეცნიერო კავშირებს.

პეტიცის ინიციატორები ქუთაისიდან თბილისისა და ბათუმის მიმართულებით სწრაფი მატარებლების დანიშვნას შემდეგი განრიგით ითხოვენ:

ქუთაისი → თბილისი
▪️ გასვლა დილის 06:00 საათზე – ჩასვლა თბილისში 09:00
▪️ გასვლა საღამოს 20:00 საათზე – ჩასვლა თბილისში 23:00

თბილისი → ქუთაისი
▪️ გასვლა დილის 06:00 საათზე – ჩასვლა ქუთაისში 09:00
▪️ გასვლა საღამოს 20:00 საათზე – ჩასვლა ქუთაისში 23:00

ქუთაისი → ბათუმი
▪️ გასვლა დილის 08:00 საათზე – ჩასვლა ბათუმში 10:00
▪️ ბათუმიდან დაბრუნება საღამოს 18:00 საათზე – ჩასვლა ქუთაისში 20:00

"გთხოვთ, განიხილოთ ეს ინიციატივა და მიიღოთ შესაბამისი გადაწყვეტილება ქუთაისის განვითარების და ქვეყნის სატრანსპორტო ინფრასტრუქტურის გაუმჯობესების მიზნით",- აღნიშნულია პეტიციის ტექსტში. 

პეტიციის ინიციატორები შესაბამისი მოთხოვნით მიმართავენ ქუთაისის მუნიციპალიტეტის მერიას, იმერეთის გუბერნიას, ასევე საქართველოს რკინიგზას და რეგიონალური განვითარების სამინისტროს.