ქუთაისიპოსტი

მასწავლებლის საგნის, უფროსი სპეციალური მასწავლებლისა და საბაზო პროფესიული უნარების გამოცდებისათვის რეგისტრაცია, დღეს, 11 მარტის 10:00 საათიდან დაიწყო.
რეგისტრაცია, მხოლოდ ელექტრონულად, შეფასებისა და გამოცდების ეროვნული ცენტრის გვერდზე მიმდინარეობს და ის 2 აპრილის 18:00 საათამდე გაგრძელდება.

საგამოცდო ცენტრის ინფორმაციით, ყველა მსურველს უფლება აქვს, აირჩიოს მხოლოდ ერთი საგანი და ასევე, სურვილის შემთხვევაში, უფროსი სპეციალური მასწავლებლისა და საბაზო პროფესიული უნარების გამოცდები.

რეგისტრაციისას შესაბამისი გამოცდის არჩევა როგორც ქართულ, ისე აზერბაიჯანულ, სომხურ და რუსულ ენებზეა შესაძლებელი. ტესტირებაში მონაწილეობის საფასური კი 50 ლარია. 

პრაქტიკოსი მასწავლებლის სტატუსის მქონე პედაგოგებისათვის საგნის გამოცდაზე, ხოლო პრაქტიკოსი სპეციალური მასწავლებლის სტატუსის მქონე პედაგოგებისათვის უფროსი სპეციალური მასწავლებლის გამოცდაზე რეგისტრაცია უფასოა.

როგორც საგამოცდო ცენტრში განმარტავენ, იმ შემთხვევაში, თუ გამოსაცდელები რეგისტრაციის საფასურს 2 აპრილის 18:00 საათამდე გადაიხდიან, მაგრამ რაიმე მიზეზით ვერ მიიყვანენ რეგისტრაციის პროცესს ბოლომდე, მათ შესაძლებლობა ექნებათ, 10 აპრილის 18:00 საათამდე დაასრულონ რეგისტრაცია. ასევე, შეიტანონ ცვლილებები სარეგისტრაციო განაცხადში (შეცვალონ საგამოცდო ქალაქი ან გამოცდა). ამ ვადის ამოწურვის შემდეგ ცვლილებების განხორციელება შეუძლებელია.

"გამოსაცდელებმა, რომლებსაც ესაჭიროებათ სპეციფიკური საგამოცდო გარემოს შექმნა, რეგისტრაციის დროს უნდა მონიშნონ - „სპეციალური პირობები“ და შეფასებისა და გამოცდების ეროვნულ ცენტრში (თბილისი, ე. მინდელის N9), რეგიონებში კი ადგილობრივ საგანმანათლებლო რესურსცენტრში 10 აპრილის 18:00 საათამდე უნდა წარმოადგინონ შესაბამისი ჯანმრთელობის ცნობა (ფორმა N100).

თუ გამოსაცდელი არ აკმაყოფილებს „ზოგადი განათლების შესახებ“ საქართველოს კანონით მასწავლებლის განათლების მიმართ წაყენებულ მოთხოვნებს, იგი ტესტირებაში მიღებულ შედეგს ვერ გამოიყენებს მასწავლებლის საქმიანობის მიზნებისათვის",- განმარტავენ საგამოცდო ცენტრში. 

საგამოცდო პროგრამები და კრებულები იხილეთ ბმულზე.