ქუთაისიპოსტი

სკოლებში პირველკლასელთა რეგისტრაცია, დღეიდან, 10 მარტიდან, დაიწყო.
პირველ ეტაპზე, სკოლებში, სპეციალური საგანმანათლებლო საჭიროების მქონე ბავშვები დარეგისტრირდებიან (21 მარტის ჩათვლით). დოკუმენტების წარდგენისა და ჩარიცხვის პერიოდი 24 მარტიდან 30 აპრილის ჩათვლითაა შესაძლებელი.

II ეტაპზე მოსწავლეთა რეგისტრაცია და დოკუმენტაციის წარდგენა 2 მაისიდან 20 მაისის ჩათვლით განხორციელდება და ამ ეტაპზე ის ბავშვები დარეგისტრირდებიან: რომელთა და-ძმაც სწავლობს სასურველ სკოლაში; რომელთა მშობელიც სასურველი სკოლის თანამშრომელია; რომელთა ოჯახიდანაც ერთდროულად ორი ან მეტი ბავშვი შედის პირველ კლასში.

III ეტაპი - საყოველთაო ონლაინ რეგისტრაცია 22 მაისს დაიწყება და 17 ივნისის ჩათვლით გაგრძელდება.

IV ეტაპზე კი დარჩენილ თავისუფალ ადგილებზე ან წინა ეტაპებზე გამოთავისუფლებულ ადგილებზე იმ მოსწავლეთა რეგისტრაცია განხორციელდება, რომლებიც I, II და III ეტაპებზე ვერ დარეგისტრირდნენ, ან სურთ რეგისტრაციის შეცვლა. ამ ეტაპისთვის რეგისტრაცია და დოკუმენტაციის წარდგენა 30 ივნისიდან 15 ივლისის ჩათვლითაა განსაზღვრული.

განათლების სამინისტროს ინფორმაციით, 2025 წლიდან, სურვილის შემთხვევაში, პირველ კლასში დარეგისტრირებას ის ბავშვებიც შეძლებენ, რომლებსაც 6 წელი 31 დეკემბრის ჩათვლით შეუსრულდებათ.

განათლების სამინისტრო მშობლებს მოუწოდებს, ყურადღებით გაეცნონ რეგისტრაციის ვადებსა და პირობებს, რათა ბავშვის სკოლაში შეყვანა დროულად და შეუფერხებლად შეძლონ.