ქუთაისიპოსტი

ქალები რეჟიმის წინააღმდეგ - ამ სახელწოდებით, დღეს, 8 მარტს, ქუთაისში მარში გაიმართება. 

მსვლელობის მონაწილეები ამბობენ, რომ 8 მარტს საქართველოში პირველად ვხვდებით ქალ პოლიტპატიმრებთან ერთად, ამიტომ ისინი, 19:00 საათზე, მე-3 სკოლასთან შეიკრიბებიან და მსვლელობას გამართავენ.

"მზია ამაღლობელი, ავტორიტარული რეჟიმის მსხვერპლი და თავისუფლებისთვის ბრძოლის სიმბოლოა დღეს. მასთან ერთად, არც სხვა ქალები ვეგუებით საქართველოში ჩამოყალიბებულ ავტორიტარიზმსა და პოლიციურ რეჟიმს, რომელმაც დაამწყვდია უდანაშაულო ადამიანები ციხეში, უგულებელყო საქართველოს კონსტიტუცია და ადამიანის ფუნდამენტური უფლებები, შეურაცხყოფას აყენებდა მოშიმშილე მზია ამაღლობელს, აწამა მშვიდობიანი მანიფესტანტები და თავისი ყოველდღიური ქმედებით მიჰყავს საქართველო სულ უფრო და უფრო ღრმა კრიზისამდე. ამიტომ, შემოგვიერთდი - ერთად გავაგონოთ რეჟიმს გაბრაზებული ქართველი ქალების ხმა!",- განმარტავენ მარშის მონაწილეები. 

ქუთაისის გარდა, დღეს მსვლელობები ბათუმში და თბილისში, რესპუბლიკის მოედანზეა დაგეგმილი. 

საქართველოს ქალაქებში საპროტესტო გამოსვლები 28 ნოემბრიდან დაიწყო, მას შემდეგ, რაც „ქართული ოცნების" ხელისუფლებამ გადაწყვიტა 2028 წლის ბოლომდე დღის წესრიგში არ დააყენოს ევროკავშირთან მის წევრობაზე მოლაპარაკების გახსნის საკითხი და 2028 წლის ბოლომდე უარი თქვას ევროკავშირის საბიუჯეტო გრანტებზე.

ბოლო ორი თვის განმავლობაში, პოლიციამ იძალადა აქციის არაერთ მონაწილეზე, მათ შორის ჟურნალისტებზე, რომლებიც პროცესებს აშუქებდნენ. ამ დრომდე არცერთი მათგანი დაკავებული არ არის.