ქუთაისიპოსტი

7-საათიანი განხილვის შემდეგ, ბათუმის საქალაქო სასასამართლომ „ნეტგაზეთისა“ და „ბათუმელების“ დამფუძნებელი მზია ამაღლობელი პატიმრობაში დატოვა.
გადაწყვეტილება, 4 მარტის წინასასამართლო სხდომაზე, მოსამართლე ვიქტორ მეტრეველმა გამაოცხადა. 

მზია ამაღლობელის ადვოკატებმა მოითხოვეს, მათი დაცვის ქვეშ მყოფისათვის აღკვეთის ღონისძიების სახით პატიმრობა გაუქმებულიყო, პროკურორები კი აცხადებდნენ, რომ კვლავ ძალაშია „საფრთხე“, მზია ამაღლობელმა „ჩაიდინოს ახალი დანაშაული“, „მოწმეებზე ზემოქმედება მოახდინოს“ და ამიტომ ის უნდა დარჩეს პატიმრობაში.

საბოლოოდ, მოსამართლემ პროკურატურის პოზიცია გაიზიარა და მზია ამაღლობელი პატიმრობაში დატოვა.

განჩინებას სხდომათა დარბაზში ხმაური მოჰყვა: “პუტინის სასამართლო”, “მონებო”, “სირცხვილია, სირცხვილი” - სკანდირებდნენ ადგილზე შეკრებილი მოქალაქეები.

მზია ამაღლობელი ბათუმის პოლიციამ, 11 იანვარს, გვიან საღამოს, ჯერ ადმინისტრაციული წესით დააკავა სტიკერის გაკვრის გამო, შემდეგ კი 12 იანვარს ხელახლა დააკავა, ამჯერად სისხლის სამართლის წესით.

ამაღლობელმა დაკავების მომენტიდან შიმშილობა დაიწყო. შიმშილობის 24-ე დღეს, ჯანმრთელობის მდგომარეობის გაუარესების გამო, ის რუსთავის მე-5, ქალთა პენიტენციური დაწესებულებიდან „ვივამედში“ გადაიყვანეს.

38-დღიანი შიმშილობის დასრულებიდან რამდენიმე დღეში კი ისევ პენიტენციურ დაწესებულებაში (27 თებერვალს) დააბრუნეს.

ჟურნალისტს პოლიციელისთვის სილის გაწვნის გამო ოთხიდან შვიდ წლამდე პატიმრობა ემუქრება.

მას სინდისის პატიმრად მიიჩნევენ კოლეგები, უფლებადამცველი ორგანიზაციები, ოპოზიციონერი პოლიტიკოსები, ევროკავშირი, ათობით საერთაშორისო ორგანიზაცია და არაერთი ქვეყნის მთავრობა.

ფოტო: პუბლიკა