ქუთაისიპოსტი

7 მარტს, უწყვეტი პროტესტის მე-100 დღეს, ქუთაისის მერიასთან პროევროპული აქცია გაიმართება.

აქციის მონაწილეები, რომლებიც ცივი ამინდის მიუხედავად, ქალაქის ადგილობრივი თვითმმართველობის შენობასთან ყოველ დღე იკრიბებიან, 7 მარტსაც, ტრადიციულ ადგილას, 18:00 საათიდან შეიკრიბებიან. 

"7 მარტს უწყვეტი პროტესტის მე-100 დღეა. 100 დღეა, თბილისისა და ქუთაისის რუსთაველზე ისმის ქართველი ხალხის მტკიცე საპროტესტო ხმა: ვითხოვთ ახალ არჩევნებს! თავისუფლება რეჟიმის ტყვეებს!

ქართველი ხალხის გასამარჯვებლად სიმტკიცე და ერთობა გადამწყვეტი იქნება. 7 მარტს, ჩვეულ ადგილას (მერიის წინ), 18:00 სთ.-დან გელოდებით ყველას, საკუთარი უფლებებისთვის, სამართლიანობისთვის, ერთმანეთის სოლიდარობისთვის",- განმარტავენ აქციის მონაწილეები.

97-ე დღეა, რაც საქართველოში უწყვეტად იმართება პროევროპული აქციები, ახალი არჩევნების ჩატარებისა და აქციებზე დაკავებული ადამიანების გათავისუფლების მოთხოვნით.

საქართველოს ქალაქებში საპროტესტო გამოსვლები 28 ნოემბრიდან დაიწყო, მას შემდეგ, რაც „ქართული ოცნების" ხელისუფლებამ გადაწყვიტა 2028 წლის ბოლომდე დღის წესრიგში არ დააყენოს ევროკავშირთან მის წევრობაზე მოლაპარაკების გახსნის საკითხი და 2028 წლის ბოლომდე უარი თქვას ევროკავშირის საბიუჯეტო გრანტებზე.

ბოლო ორი თვის განმავლობაში, პოლიციამ იძალადა აქციის არაერთ მონაწილეზე, მათ შორის ჟურნალისტებზე, რომლებიც პროცესებს აშუქებდნენ. ამ დრომდე არცერთი მათგანი დაკავებული არ არის.

გზის გადაკეტვისთვის კი ჯარიმები 2024 წლის 30 დეკემბრიდან გაიზარდა. ამ ქმედებაში მონაწილეობისთვის ადმინისტრაციული სახდელი, 500 ლარის ნაცვლად, 5000 ლარი გახდა, ხოლო ორგანიზებისთვის - 5000-ის ნაცვლად 15 000 ლარი.