ქუთაისიპოსტი

ვასო აბაშიძის სახელობის „ახალმა თეატრმა“ ქუთაისში, საპროტესტო მანიფესტი „ჩვენ ერთად გადმოვცურავთ ზღვას“ გამართა.
„ახალი თეატრის“ მსახიობებმა ასსაფეხურიან კიბეებთან შეკრებილ მოქალაქეებს სიტყვით მიმართეს. აღნიშნეს, რომ მათი პერფორმანსები, გასვლები რეგიონებში, სოლიდარობის მიზნით კეთდება და სინდისის ყველა პატიმარს ეძღვნება.

"ვერ ვეგუები იმ უსამართლობას, რომელსაც ასე უკანონოდ გვიკანონებენ. ყველაფერს აკეთებენ იმისათვის, რომ გაგვაჩუმონ, შეგვაშინონ, გაგვაჩერონ, მაგრამ ჩვენ ვამბობთ: არ გვეშინია, არ გავჩუმდებით, არ გავჩერდებით და არასდროს დავნებდებით!",- მიმართა მოქალაქეებს მსახიობმა ნანა ბუთხუზმა. 

"ახალი თეატრის" არტისტებმა სოლიდარობის მნიშვნელობაზე ისაუბრეს. მათი თქმით, მაშინ, როცა ე.წ ხელისუფლება დრაკონული კანონებით, რეპრესიებითა და ცინიზმით გვებრძვის, ერთად დგომა ყველაზე მნიშვნელოვანია. 

ამასთან, მათ მსახიობ ანდრო ჭიჭინაძესა და რეჟიმის მიერ უკანონოდ დაკავებულ სხვა პატიმრებს სცენიდან სოლიდარობა გამოუცხადეს. 

"ანდრო ჩვენი მეგობარია. მას და რეჟიმის მიერ დაჭერილ სხვა ბიჭებს აერთიანებთ ერთი რამ: ქვეყნის სიყვარული. ეს არის მათი დანაშაული. დღეს ეს ბიჭები, მათი შვილები და მათი ამბავი ჩვენი ნაიარევია. თავისუფლება ანდრო ჭიჭინაძეს და სისტემის მიერ დაკავებულ ყველა პატიმარს",- განაცხადეს მათ.




"ახალი თეატრის" მანიფესტს ქუთაისის მესხიშვილის თეატრის მსახიობების ნაწილი შეუერთდა. მათ საქართველოს კონსტიტუციიდან ის მუხლები წაიკითხეს, რომელიც ადამიანის სიტყვისა და გამოხატვის თავისუფლებას იცავს. 

„ახალი თეატრი“ რეგიონებში მოგზაურობას აგრძელებს და ხვალ გურიაში ჩავა.

23 იანვარს, რეჟისორმა დავით დოიაშვილმა, ვასო აბაშიძის სახელობის თეატრთან, საპროტესტო მანიფესტის დროს, რეგიონებში გასვლა დაანონსა.