ქუთაისიპოსტი

ცესკო, ქუთაისში იმ ადგილების ჩამონათვალს აქვეყნებს, სადაც 26 ოქტომბრის საპარლამენტო არჩევნებისთვის პოლიტიკურ პარტიებს სააგიტაციო მასალის განთავსების უფლება აკრძალული და ნებადართული აქვთ.

კერძოდ, არჩევნებში მონაწილე სუბიექტებს ნება დაერთოთ, საარჩევნო პერიოდში, პლაკატები განათავსონ ქუთაისში, წერეთლის ქუჩიდან სადგურის მოედნამდე არსებულ საყრდენ კედელზე. 

ბეჭდვითი სააგიტაციო მასალების გაკვრა ასევე დასაშვებია:

ავტომშენებლის ქუჩა №33-ის წინამდებარე ტროტუარზე;

ახალგაზრდობის გამზირის №21-ის დასავლეთით არსებულ ნაპირსამაგრი ნაგებობების ფასადზე;

გალაკტიონ ტაბიძის ქუჩის დასაწყისში, წითელი ხიდის სამხრეთით ავტოსადგომთან მდებარე სკვერში;

დავით მანდარიას ქუჩაზე არსებულ კედელზე, №12 საჯარო სკოლიდან სადგურის მოედნამდე;

ლეონიძის ქუჩა №4-ის მიმდებარედ არსებულ ტროტუარზე (ატს-ის შენობის დასავლეთით); ლ.ავალიანის ქუჩა №2-ის წინამდებარე ტროტუარზე;

ახალგაზრდობის გამზირის მე-5 შესახვევში მდებარე „მუხნარის“ ადმინისტრაციული ერთეულის ადმინისტრაციული შენობის მიმდებარე გაზონში;

ანჯაფარიძისა და ფოთის ქუჩების კვეთაზე არსებულ გაზონში (სადერევაციო არხის მიმდებარედ);

ვაჟა-ფშაველასა და კიკვიძის ქუჩების კვეთაზე არსებულ სკვერში;

თაბუკაშვილისა და ოცხელის ქუჩების კვეთაზე, ტროტუართან (არხის მიმდებარე ტერიტორია);

სულხან-საბას გამზირი №9-ის დასავლეთით არსებულ ტერიტორიაზე;

ნიკეას ქუჩის №32/№34 მრავალსართულიანი საცხოვრებელი სახლის აღმოსავლეთით, ქუჩის მოპირდაპირე მხარეს არსებულ გაზონში.

პოლიტიკური პარტიები ვალდებულნი არიან სააგიტაციო მასალები არჩევნების საბოლოო შედეგების ოფიციალურად გამოქვეყნებიდან 15 დღის ვადაში ჩამოხსნან. 

რაც შეეხება იმ ადგილებს, სადაც პლაკატების განთავსება/გაკვრა აკრძალულია, ეს არის საკულტო ნაგებობების, კულტურული მემკვიდრეობის შენობა-ნაგებობების, სახელმწიფო ხელისუფლებისა და მუნიციპალიტეტის ორგანოების, სასამართლოების, პროკურატურის, სამხედრო შენაერთების, პოლიციის, საქართველოს სახელმწიფო უსაფრთხოებისა და დაზვერვის სამსახურების, სახელმწიფო დაცვის სპეციალური სამსახურის დანაყოფების შენობების ინტერიერები და ექსტერიერები.

საარჩევნო პლაკატების გაკვრა ასევე აკრძალულია საგზაო ნიშნებზე, ირ.აბაშიძის გამზირზე კინო „სულიკოდან“ „ავტოქარხნის“ გზაგამტარ ხიდამდე, ბაგა-ბაღებისა და სხვა საგანმანათლებლო დაწესებულებების შენობებზე, სპორტის სასახლის შენობაზე, მუზეუმების, თეატრებისა და რეაბილიტირებული შენობების ფასადებზე, გარე-განათების ბოძებსა და მწვანე ნარგავებზე.

ცნობილია ის ადგილებიც, სადაც, წინასაარჩევნო კამპანიის პერიოდში, პოლიტიკურ პარტიებს/საარჩევნო სუბიექტებს ამომრჩევლებთან შეხვედრების, კრებების, საჯარო დებატების, დისკუსიების, შეკრებებისა და მანიფესტაციების ორგანიზების უფლება აქვთ. ესენია: ქუთაისში, თაბუკაშვილის ქუჩა №2, „ქალაქ ქუთაისის მოსწავლე-ახალგაზრდობის პარკის“ ტერიტორიაზე, ახალგაზრდობის გამზირი №98-ის ჩრდილოეთით და ახალგაზრდობის გამზირი №96-ის სამხრეთით არსებულ შენობაში („ქალაქ ქუთაისის მიხეილ ქორქიასა და ზურაბ საკანდელიძის სპორტის სასახლე“) და გ. ტაბიძის ქუჩის №58-ში მდებარე შენობაში (№2 მუსიკალური სკოლის შენობა). ამასთან, მითითებული ღონისძიებების, შეხვედრების გრაფიკი შეთანხმებული უნდა იქნეს ზემოთ ჩამოთვლილი ობიექტების ადმინისტრაციასთან.

26 ოქტომბერს, საქართველოში, საპარლამენტო არჩევნები გაიმართება.