ქუთაისიპოსტი

ევროკავშირის ელჩი პაველ ჰერჩინსკი საქართველოში მოახლოებულ 26 ოქტომბრის საპარლამენტო არჩევნებს ეხმაურება.

მისი განცხადებით, თუ საქართველო გახდება ერთპარტიული სახელმწიფო, სადაც ოპოზიცია აკრძალულია და სამოქალაქო საზოგადოება კი იძულებულია საზღვარგარეთ წავიდეს, მაშინ ვერ გახდება ევროკავშირის წევრი სახელმწიფო. 

სწორედ ამიტომ, მან იმედი გამოთქვა, რომ ამ არჩევნებზე ქართველი ხალხი მხარს დაუჭერს იმ პოლიტიკურ ძალას, რომელიც თავისუფლებისა და დემოკრატიის ფასეულობებს იზიარებს.

"ევროკავშირი დაფუძნებულია კონკრეტულ ფასეულობებზე და ეს ფასეულობები გადახედვას არ ექვემდებარება. ეს არის თავისუფლება, დემოკრატია, კანონის უზენაესობა, უმცირესობების უფლებები და ჩვენ იმედი გვაქვს, რომ ქართველი ხალხი 26 ოქტომბერს აირჩევს მთავრობას, რომელიც ამ ნორმებს დაიცავს.

ნება მომეცით, მკაფიოდ ვთქვა,რომ თუ საქართველო გახდება ერთპარტიული სახელმწიფო, სადაც პოლიტიკური ოპოზიცია აკრძალულია და სამოქალაქო საზოგადოება იძულებულია უცხოეთში წავიდეს, თუ უმცირესობების უფლებები დაცული არ იქნება, მაშინ საქართველო ვერ გახდება ევროკავშირის წევრი ვერც დღეს, ვერც ხვალ და ვერც ზეგ. ეს არის ნორმები, რომლებიც ყველა კანდიდატმა ქვეყანამ უნდა დააკმაყოფილოს

ჩვენ იმედი გვაქვს, რომ არჩევნები იქნება სამართლიანი და თავისუფალი, რომ იქნება კონკურენტული, ინკლუზიური, გამჭვირვალე და გაიმართება უმაღლესი საერთაშორისო და ევროპული სტანდარტებით. თუმცა, თუ აღმოჩნდა და საერთაშორისო დამკვირვებლებმა დაადგინეს სერიოზული დარღვევები, მაშინ ჩვენგან იქნება შესაბამისი პასუხი. ჩვენ ეს გამოვცადეთ ბელარუსის შემთხვევაში და იმედი გვაქვს, რომ საქართველოს შემთხვევაში ამას არასდროს გამოვცდით",- განაცხადა ევროკავშირის ელჩმა.

ჰაველ ჰერჩინსკმა აღნიშნა ისიც, რომ იმ ცხრა ნაბიჯიდან, რომელიც ევროკომისიამ საქართველოს წარუდგინა, პირველი ნაბიჯი ანტიევროპული პროპაგანდის შეწყვეტაა, რომელიც კვლავ გრძელდება. 

"სამწუხაროდ, ანტიევროპული პროპაგანდა გრძელდება, თუმცა რამდენჯერაც არ უნდა გაიმეოროს ვინმემ ის, რაც არის ტყუილი, სიმართლე მაინც ერთია: ჩვენ ვართ მშვიდობის, სტაბილურობის, განვითარების მომხრე. ევროკავშირი არის გლობალური მშვიდობის პარტია და ჩვენ ვიცით, სად არის გლობალური ომის პარტია. ის არის მოსკოვში. სწორედ რუსეთი შეიჭრა საქართველოში 2008 წელს და უკრაინაში 2014 წელს, სწორედ რუსეთმა დაიწყო სრულმასშტაბიანი ომი უკრაინაში 2022 წელს და სწორედ რუსეთი იყენებს ჰიბრიდულ მეთოდებს, რათა დათესოს ქაოსი მთელს მსოფლიოში",- განაცხადა ევროკავშირის ელჩმა.

26 ოქტომბერს საქართველოში, მორიგი საპარლამენტო არჩევნები გაიმართება, რომელსაც ქვეყნის დემოკრატიული განვითარებისა და ევროკავშირში ინტეგრაციის თვალსაზრისით გადამწყვეტი როლი ენიჭება.

აღსანიშნავია, რომ ეს არჩევნები იქნება პირველი საპარლამენტო არჩევნები საქართველოს ისტორიაში, რომელიც ევროკავშირის წევრობის კანდიდატი ქვეყნის სტატუსის ქვეშ გაიმართება.