ქუთაისიპოსტი

ოჯახის სიწმინდის დღე, რომელიც საქართველოში, კათოლიკოს პატრიარქის ლოცვა-კურთხევითა და ინიციატივით, 2014 წლიდან დაწესდა, ქუთაისშიც აღნიშნეს.
მოქალაქეები დილიდან ქალაქის ცენტრალურ მოედანზე შეიკრიბნენ, შემდეგ კი მსვლელობით ასსაფეხურიან კიბეებთან გადაინაცვლეს.

მსვლელობაში მონაწილეობა მღვდელმსახურებმა, მრევლმა, „ოცნების“ აქტივისტებმა და რეგიონებიდან ჩამოსულმა მოქალაქეებმა (ძირითადად, საჯარო მოხელეებმა) მიიღეს.


"ჩამოვედი ვანიდან, ოჯახის სიწმინდის გულიზა ვიმყოფები აქ", - გვითხრა მსვლელობის ერთ-ერთმა მონაწილემ.



ადგილზე შეკრებილ ხალხთან გამოჩნდნენ ქუთაისის ადგილობრივი თვითმმაართველობის ხელმძღვანელი პირებიც. მათ შორის, საკრებულოს თავმჯდომარე ირაკლი შენგელია, თავმჯდომარის მოადგილე და ამავდროულად პარტიის თავმჯდომარე გია ბასილაძე და ქალაქის ვიცე მერი დავით ერემეიშვილი.


ქუთაისის საფეხბურთო კლუბი "სერვალი"

ასსაფეხურიან კიბეებთან მოწყობილ სცენაზე, მამაოებმა სამშვიდობო პარაკლისი აღავლინეს. ასევე შესრულდა საქართველოს ჰიმნი და საგალობლები.

ღონისძიებაში მონაწილეობა ქუთაისის სიმღერისა და ცეკვის სახელმწიფო აკადემიურმა ანსამბლმა და იოსებ კეჭაყმაძის სახელობის კამერულმა გუნდმა მიიღო.

ჰომოფობიასა და ტრანსფობიასთან ბრძოლის საერთაშორისო დღე, 17 მაისი, კათოლიკოს-პატრიარქმა ილია მეორემ საქართველოში ტრადიციული ქართული ოჯახის დაცვის დღედ 2014 წელს გამოაცხადა. ამ დღის აღსანიშნავად სამღვდელოება და მრევლი საქართველოს სხვადასხვა ქალაქში მსვლელობას უკვე მეათე წელია აწყობს.