ქუთაისიპოსტი

პროფკავშირების გაერთიანების ინიციატივას, საქართველოში, მინიმალური ხელფასის სტანდარტის დაწესების შესახებ, ჯანმრთელობის დაცვისა და სოციალურ საკითხთა კომიტეტმა მხარი დაუჭირა.
ინიციატივა საქართველოს შრომის კანონმდებლობაში ცვლილებებს გულისხმობს, რომლის მიხედვითაც, მინიმალური ხელფასი საშუალო ხელფასის არანაკლებ 40%-ის ოდენობით უნდა განისაზღვროს (2022 წლის მონაცემებით, 40% შეადგენს 636 ლარს).

"მინიმალური ხელფასის დაწესება, მის აღსრულებაზე ზედამხედველობა და მისი პერიოდული გადასინჯვა ხელს შეუწყობს სოციალური სამართლიანობის დამკვიდრებას, ღირსეულ დასაქმებას, სამართლიანი სახელფასო სტრუქტურის ჩამოყალიბებას, ხელფასების გაზრდის მოთხოვნით კოლექტიური შრომითი დავებისა და გაფიცვების, სოციალური კონფლიქტების შემცირებას. შემცირდება ხელფასებს შორის არსებული მწვავე უთანასწორობა, გენდერული ნიშნით სახელფასო სხვაობა, სიღარიბის დონის მაღალი მაჩვენებელი, დამსაქმებელთა სოციალური პასუხისმგებლობის მეტწილად დაბალი დონე, დაბალშემოსავლიანი მოსახლეობის სოციალური სიდუხჭირე“,- განმარტავენ პროფკავშირების გაერთიანებაში.

მათივე ინფორმაციით, მინიმალური ხელფასი 636 ლარიან ნიშნულზე 192 ათასამდე დაქირავებით დასაქმებულს შეეხება, რომელთაგანაც 49 ათასზე მეტ ადამიანს ხელფასი შრომისუნარიანი მამაკაცის საარსებო მინიმუმზე დაბალი აქვს.

საქსტატის 2022 წლის თებერვლის მონაცემებით, საქართველოში 100 ლარზე ნაკლები ხელფასი 12 555 ადამიანს ჰქონდა, შრომისუნარიანი მამაკაცის საარსებო მინიმუმზე დაბალი ხელფასი კი დაქირავებით დასაქმებულთა 5,6%-ს.

ამასთან, ყველაზე მაღალხელფასიანი 277 დასაქმებული იმდენივე ხელფასს იღებდა, რასაც 300 ათასამდე დაბალანაზღაურებადი დასაქმებული ერთად აღებული, ხოლო 56 000 მაღალხელფასიანი პირი იღებდა იმდენივეს, რამდენსაც 700 000 სხვა დასაქმებული.

ღირსეული მინიმალური ხელფასის დაწესების მოთხოვნით, საქართველოს პროფკავშირების გაერთიანებამ პარლამენტში ინიციატივა გასული წლის ოქტომბერში შეიტანა.

საქართველოში მინიმალური ხელფასი ჯერ კიდევ 1999 წლის ბრძანებულებით დამტკიცებული 20 ლარით არის განსაზღვრული, რაც საქსტატის დაწესებულ საარსებო მინიმუმზე 12,6- ჯერ ნაკლებია.


ამავე თემაზე:

636 ლარი - მინიმალური ხელფასის დაწესებისთვის პროფკავშირებმა პარლამენტს წინადადებით მიმართა