ქუთაისიპოსტი

ქუთაისში, რიონისპირა სახლების რეკოსტრუქციის პროექტის ფარგლებში, საპროექტო სამუშაოების შემსრულებელი კომპანია ,,კარკასი’’ დამკვეთს, ,,მუნიციპალურ განვითარების ფონდს’’ უზენაეს სასამართლოში უჩივის.

"სასამართლო პროცესი მომდევნო წელს გაიმართება. უკვე წლებია ჩვენი სიმართლის დამტკიცებისთვის ვიბრძვით", - ამბობს ,,კარკასის'' დირექტორი გიორგი მაჭარაშვილი.

კომპანიაში სააპელაციო სასამართლოს იმ გადაწყვეტილებას ასაჩივრებენ, რომლის მიხედვითაც მგფ-მა კომპანიას შესრულებული სამუშაოებისთვის 439 593 ლარის ნაცვლად, უფრო ნაკლები, დაახლოებით, 255 051 ლარამდე უნდა გადაუხადოს.

439 593 ლარი ის თანხაა, რომლის გადახდა მგფ-ს ქუთაისის საქალაქო სასამართლომ დააკისრა, თუმცა,  მუნიციპალურმა განვითარების ფონდმა თანხის გადახდის ნაცვლად, საქალაქო სასამართლოს გადაწყვეტილება სააპელაციო სასამართლოში გაასაჩივრა.

ქუთაისის სააპელაციო სასამართლომ კი დაადგინა, რომ კომპანიის მიერ წარმოდგენილი ჯებირების პროექტი ხელშეკრულების მოთხოვნებს არ შეესაბამებოდა და სამუშაოების დამკვეთი ვალდებული არ იყო მისი შესრულებისთვის კომპანიისთვის თანხა გადაეხადა, შესაბამისად, ფონდს ახლა შემცირებული თანხის გადახდა უწევს.

კომპანია "კარკასში" ამბობენ, რომ ჯებირებით რიონის გამაგრების პროექტი სასწრაფო და უმნიშვნელოვანესი იყო ქალაქის კულტურული მემკვიდრეობის შენარჩუნებისთვის.

რიონისპირა სახლების საქმეზე დავა 4 წელია გრძელდება. კომპანიასთან ხელშეკრულების შეწყვეტის მიზეზად ფონდი არაჯეროვნად და არაოპერატიულად შესრულებულ სამუშაოებს ასახელებს. შპს ,,კარკასში'' კი აცხადებენ, რომ ორგანიზაციას შესრულებული სამუშაოების შესახებ ინფორმაციას დროულად აწვდიდნენ, მაგრამ ამ ინფორმაციაზე ფონდში ასევე დროულად არ პასუხობდნენ.

გარდა ამისა, კომპანიაში საეჭვოდ მიიჩნევენ, ,,მუნიციპალური განვითარების ფონდის'' მიერ წარდგენილ ლევან სამხარაულის ექსპერტიზის დასკვნას, რომლის მიხედვით, სამუშაოები უხარისხოდ შესრულდა. ,,კარკასის'' მითითებით, ექსპერტიზას გადაეცა არა მათ მიერ წარდგენილი ორი ესკიზური ვარიანტი, არამედ მხოლოდ ერთი, რომელიც არ იყო III ეტაპის საბოლოო დოკუმენტაცია, ეს იყო განსახილველი, მუშა ვარიანტი, რის დასასრულებლადაც მოსარჩელეს კომენტარების და შენიშვნების მიღებიდან ეძლეოდა ოთხი კვირა.

რიონისპირა სახლების რეაბილიტაციისთვის საჭირო პროექტირებისთვის სახელმწიფო შესყიდვა 2019 წელს რეაგიონალურმა განვითარების ფონდმა გამოაცხადა. ელექტრონული ტენდერი შპს „კარკასმა“ მოიგო. მხარეებს შორის ხელშეკრულება, 2019 წლის 11 ივნისს, 799 999 ლარზე გაფორმდა.

დოკუმენტის მიხედვით, საპროექტო მომსახურება 4 ეტაპს მოიცავდა, რომლის მიხედვით, კომპანიას სამუშაოები 2020 წლის თებერვალში უნდა დაესრულებინა. სწორედ ვადაში შეუსრულებლობა გახდა სადავო.

კერძოდ, მგფ, რომელიც სამუშაოების დამკვეთია,"კარკასს" ხელშეკრულებით კუთვნილ თანხას იმ მიზეზით არ უხდიდა, რომ კომპანია საპროექტო სამუშაოებს განსაზღვრულ ვადებში არ ასრულებდა.


ქალაქის ერთ-ერთი ისტორიული უბნის აღდგენის პირობა ქუთაისის მერიამ 2018 წელს გასცა, თუმცა ამ დრომდე არ არსებობს პროექტი, რომლის მიხედვითაც უნდა მოხდეს რიონისპირა ჩამონგრეული სახლების რეკონსტრუქცია.

ამავე თემაზე:

ქუთაისში რიონისპირა სახლებს რეკონსტრუქცია ჩაუტარდება

ქუთაისში რიონისპირა სახლების რეკონსტრუქციისთვის ტენდერი გამოცხადდა