ქუთაისიპოსტი

ქუთაისის მაჟორიტარმა დეპუტატმა ზაზა ლომინაძემ „რუსული კანონპროექტის“ ჩასაგდებად კენჭისყრაში მონაწილეობა არ მიიღო.

ის პლენარულ სხდომას ესწრებოდა, თუმცა „რუსული კანონის“ წინააღმდეგ მაინც არ წავიდა და ხმის მიცემისგან თავი შეიკავა.

ზაზა ლომინაძე ერთ-ერთია იმ 78 დეპუტატს შორის, რომელმაც აღნიშნულ კანონპროექტს, პირველი მოსმენისას, მხარი დაუჭირა. 



„რუსულ კანონპროექტს“  მეორე მოსმენით მხარი არ დაუჭირა 35-მა დეპუტატმა, მომხრე „ოცნების“ ერთადერთი დეპუტატი აღმოჩნდა.

კანონპროექტის დამტკიცებას მხარი მხოლოდ დიმიტრი სამხარაძემ დაუჭირა. დეპუტატებიდან „პრინციპული“ მხოლოდ ის აღმოჩნდა.

მასშტაბური გამოსვლებისა და პროტესტის შედეგად, „ქართულმა ოცნებამ“ რუსული კანონპროექტი მეორე მოსმენით ჩააგდო.

დეპუტატებმა კანონპროექტი არც კი განიხილეს, პირდაპირ კენჭისყრაზე დააყენეს.

„ოცნებამ "უცხოური გავლენის გამჭვირვალობის შესახებ" რუსული კანონპროექტის გაწვევის შესახებ 9 მარტს, დილას განაცხადა. მანამდე თბილისსა და საქართველოს სხვადასხვა ქალაქში საპროტესტო აქციები მიმდინარეობდა.

„ოცნებიდან“ ფორმალურად წასულმა ე.წ "ხალხის ძალის" დეპუტატებმა დააინიცირეს კანონპროექტი, რომლის მიხედვითაც ნებისმიერი მედია თუ არასამთავრობო ორგანიზაცია, რომელიც შემოსავლის 20%-ზე მეტს უცხოეთიდან იღებს, "უცხოური გავლენის აგენტად" უნდა დარეგისტრირდეს.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.

მსგავსი კანონი რუსეთში 2012 წლიდან სწორედ სამოქალაქო ორგანიზაციებისა და მედიის რეპრესიებისა და საბოლოოდ, ქვეყნიდან გასაძევებლად გამოიყენეს.