ქუთაისიპოსტი

საქართველოს ყოფილი პრეზიდენტები, გიორგი მარგველაშვილი, მიხეილ სააკაშვილი და უმაღლესი თანამდებობის ყოფილი პირები ევროკავშირს წერილით მიმართავენ, მიანიჭოს საქართველოს კანდიდატის სტატუსი.

„...ვეთანხმებით მათ მიერ წამოყენებულ მოთხოვნებს, მათი შესრულების მიზანშეწონილობას, მაგრამ ვითარების სირთულიდან და რეგიონში არსებული გამოწვევებიდან გამომდინარე გთხოვთ, არ დაშალოთ ტრიო - უკრაინა, მოლდოვა, საქართველო, არამედ მოგვცეთ კანდიდატის სტატუსი და მოთხოვნები დატოვოთ შემდეგ შესასრულებლად", - განაცხადა მარგველაშვილმა, რომელმაც წერილი ევროკავშირის ელჩს, კარლ ჰარცელს გადასცა.

ყოფილი პრეზიდენტების გარდა წერილს ხელს აწერენ პარლამენტის თავმჯდომარეები, რომლებიც 2016 წელს იკავებდნენ თანამდებობას: დავით უსუფაშვილი, დავით ბაქრაძე, ნინო ბურჯანაძე, აკაკი ასათიანი.

მარგველაშვილის ინფორმაციით, მიმართვას არ შეუერთდა მოქმედი პრეზიდენტი, სალომე ზურაბიშვილი.

17 ივნისს ცნობილი გახდა, რომ ევროკომისია რეკომენდაციას უწევს საქართველოს, მიიღოს ევროპული პერსპექტივა გარკვეული პირობების სანაცვლოდ, განსხვავებით უკრაინისა და მოლდოვისგან, რომლის კანდიდატობასაც დაუჭირა მხარი.

კანდიდატის სტატუსის მინიჭებაზე საბოლოო გადაწყვეტილებას კი 23-24 ივნისის სამიტზე მიიღებს ევროპული საბჭო, რომელიც შედგება ევროკავშირის წევრი ქვეყნების სახელმწიფოს მეთაურებისგან, საბჭოს პრეზიდენტისა და ევროკომისიის პრეზიდენტისგან.

რუსეთის თავდასხმის შემდეგ, საომარ მდგომარეობაში მყოფმა უკრაინამ ევროკავშირის წევრობის განაცხადი 28 თებერვალს წარადგინა. 3 მარტს ეს გააკეთეს საქართველომ და მოლდოვამაც.