ქუთაისიპოსტი

საქართველოს მთავრობის ინიციატივით „წამლისა და ფარმაცევტული საქმიანობის შესახებ“ კანონში ცვლილებები შედის.
ცვლილებების პროექტზე ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის პირველმა მოადგილემ, თამარ გაბუნიამ პლენარულ სხდომაზე ისაუბრა.

დაჩქარებული წესით განხილვისთვის მოთხოვნილი კანონპროექტით, ხარისხიან მედიკამენტებზე ხელმისაწვდომობა და იმპორტირებულ პროდუქციაზე კარგი საწარმოო პრაქტიკის (GMP) დანერგვა იგეგმება.

„კანონპროექტი იმპორტირებულ პროდუქციაზე კარგი საწარმოო პრაქტიკის სტანდარტების დანერგვას ითვალისწინებს. ჯანდაცვის სამინისტრომ იმპორტირებულ პროდუქტებზე კარგი საწარმოო პრაქტიკის მოთხოვნის აუცილებლობა უკვე განიხილა, რაც ხარისხიანი მედიკამენტების ხელმისაწვდომობას ისახავს მიზნად.

კანონპროექტის მთავარი არსი, იმპორტირებულ პროდუქტზე GMP-ის დამადასტურებელი დოკუმენტაციის მოთხოვნას ითვალისწინებს, რაც კონკურენციის სააგენტოს რეკომენდაციასაც წარმოადგენს, რათა ადგილობრივი და იმპორტირებული პროდუქცია თანაბარ პირობებში ჩადგეს“, - განაცხადა თამარ გაბუნიამ.

მინისტრის პირველი მოადგილის ინფორმაციით, საქართველოს მთავრობა 2022 წლის 1 მარტამდე იმპორტირებულ პროდუქტზე GMP-ის დაშვების ეტაპებს წარმოადგენს, რაც უკვე არსებულ იმპორტირებულ პროდუქტებზე GMP-ის მოთხოვნებს და ვადებს მოაწესრიგებს.

კანონპროექტთან დაკავშირებით სხდომათა დარბაზში დეპუტატების მხრიდან განსხვავებული მოსაზრებები გამოითქვა. ცვლილებების პროექტზე შეფასებები საპარლამენტო უმრავლესობის და ოპოზიციის წარმომადგენლებმა გამოთქვეს.

საკითხის განხილვის შემდეგ, პარლამენტმა „წამლისა და ფარმაცევტული საქმიანობის შესახებ“ კანონში ცვლილებების შეტანის კანონპროექტი, პირველი მოსმენით, 76 ხმით, 2-ის წინააღმდეგ მიიღო.