ქუთაისიპოსტი

ქუთაისში მეწარმეებს იმ ახალი საგადასახადო ინიციატივის შესახებ მიაწოდეს ინფორმაცია, რომელიც მცირე მეწარმეობის დაბეგვრის შეღავათიანი საგადასახადო რეჟიმის შემოღებას ითვალისწინებს.

ახალი ინიციატივის შესაბამისად, მცირე ბიზნესის სტატუსი მიენიჭებათ მეწარმეებს, რომელთა ერთობლივი შემოსავალი წლის განმავლობაში იქნება 500 000 ლარამდე, ნაცვლად დღემდე არსებული 100 000 ლარისა.

"მცირე მეწარმეებისთვის საშემოსავლო გადასახადი ხუთჯერ შემცირდება. 5-დან 1%-მდე შემცირდება, ხოლო ზღვარი ასი ათასიდან ხუთასი ათასამდე, რაც საშუალებას გვაძლევს, რომ აღნიშნული რეფორმით ისარგებლოს დაახლოებით 120 000-მა მცირე მეწარმემ", - ამბობს ფინანსთა მინისტრის მოადგილე, ლაშა ხუციშვილი. 

სამინისტროს ამ ინიციატივას დადებითად აფასებენ ადგილობრივი მეწარმეები. 

"მცირე მეწარმეობის განვითარებისთვის, ალბათ, დროული და სწორად გადადგმული ნაბიჯია. ეს უდიდესი ბიძგი იქნება სახელმწიფოს მხრიდან ფერმერებისა და მეწარმეებისთვის", - ამბობს მეწარმე, მინდია ქავთარაძე. 

მცირე ბიზნესს ვალდებულება ექნება კანონმდებლობით დადგენილ შემთხვევებში, მხოლოდ გამოიყენოს საკონტროლო-სალარო აპარატი და სასაქონლო ზედნადები.

გადასახადის დეკლარირება/გადახდა მოხდება ყოველთვიურად და მცირე მეწარმეებისათვის გაუქმდება მიმდინარე (ე.წ. საავანსო) გადასახდელების გადახდის ვალდებულება.

სამინისტროში სჯერათ, რომ ახალი საგადასახადო რეფორმა უზრუნველყოფს სექტორის უფრო მეტ გამჭვირვალობას და  შემოთავაზებული ცვლილებები მნიშვნელოვანი სტიმული იქნება მცირე ბიზნესის შემდგომი განვითარებისთვის საქართველოში.