ქუთაისიპოსტი

ქუთაისში, 2015 წლის იანვრიდან ამ დრომდე, 300-მეტი მსურველიდან, მიწის ნაკვეთი საკუთრებაში მხოლოდ 178 მოქალაქეს გადაეცა.

ექვს მათგანს უარი ეთქვა, ხოლო დანარჩენი საქმეები განხილვის პროცესშია.

მოქალქეების მიერ თვითნებურად დაკავებულ ქონებას, ქუთაისის საკრებულოსთან არსებული ფიზიკური და კერძო სამართლის პირების მფლობელობაში არსებული მიწის ნაკვეთებზე საკუთრების უფლების აღიარების მუდმივმოქმედი კომისია ამტკიცებს.

საუბარია, იმ მიწის ნაკვეთზე ან შენობა-ნაგებობაზე, რომელიც მათ წლების განმავლობაში სარგებლობაში ჰქონდათ, მაგრამ გარკვეული მიზეზების გამო, საკუთრების უფლების დამადასტურებელი დოკუმენტი არ გააჩნდათ.

"ჩვენთან არის ისეთი საქმეები, როდესაც მოქალაქეს მიწის ობიექტი თვითნებურად აქვს დაკავებული და მხოლოდ მეზობლები ადასტურებენ, რომ ეს მიწის ნაკვეთი კონკრეტულ ადამიანს ეკუთვნის, რადგან სხვა რაიმე დოკუმენტი არ გააჩნიათ", - ამბობს ქუთაისის საკრებულოსთან არსებული ე.წ. მიწის კომისიის თავმჯდომარე, ლაშა გვენეტაძე.

მიწის საკადატრო ნახაზი, ამონაწერი საჯარო რესტრიდან და მეზობლების თანხმობა - ეს ის ძირითადი დოკუმენტებია, რომელიც მოქალაქემ კომისიას უნდა წარუდგინოს. ასევე, კონკრეტულ მიწის ნაკვეთზე, რომლის საკუთრებაში გადაცემასაც მოქალაქე ითხოვს, არ უნდა გადიოდეს სხვადასხვა კომუნიკაციების ხაზები. მაგალითად, ელექტროენერგიის, წყლისა და გაზის მილები.

განაცხადის შეტანის შემდეგ, 7 წევრიან კომისიას 6 თვიანი ვადა აქვს იმისთვის, რომ საქმე განიხილოს და გადაწყვეტილება მიიღოს.

მიწის ნაკვეთებზე საკუთრების უფლების აღიარების მუდმივმოქმედი კომისიის თავმჯდომარის, ლაშა გვენეტაძის განმარტებით, საბოლოო დასკვნის მიღებამდე ადგილზე მოწმდება თუ რა ობიექტზეა საუბარი და რამდენად შესაძლებელია მოქალაქისთვის მისი საკუთრებაში გადაცემა.

როგორც გაირკვა, ე.წ მიწის კომისია მხოლოდ 2007 წლამდე თვითნებურად ამ მართლზომიერ მფლობელობაში არსებული მიწის ნაკეთების საქმეს იხილავს.
საკუთრების აღიარება მოქალაქეს უსასყიდლოდ იმ შემთხვევაში შეუძლია, თუკი ის სიციალურად დაუცვველია.

სხვა შემთხვევაში, საკუთრების დაკანონების ღირებულება იმაზეა დამოკიდებული, ესა თუ ის მიწის ნაკვეთი ქალაქის რომელ ზონაში მდებარეობს. მაგალითად, პირველ ზონაში 1 კვ.მ-ის ფასი 6 ლარია, მეორე ზონაში - 3 ლარი, ხოლო მესამე ზონაში 1,20 ლარს შეადგენს.

"თუკი შენობა არის განთავსებული მიწის ნაკვეთზე, მისი ღირებულება არ ანგარიშდება, რადგან კანონში არ არის მითითებული", - ამბობს ლაშა გვენეტაძე.

2015 წლიდან ამ დრომდე, საკუთრების უფლების დაკანონებისთვის, ადგილობრივ ბიუჯეტში მოქალაქეების მიერ გადახდილმა თანხამ, სულ 69 744 ლარი შეადგინა.