ქუთაისიპოსტი

"ერთიანმა ნაციონალურმა მოძრაობამ" ქუთაისში ამომრჩევლებთან რუსთაველის გამზირზე შეხვედრა გამართა.

მხარდამჭერების წინაშე პარტიის ლიდერები გამოვიდნენ. დავით ბაქრაძემ აქციაზე შეკრებილ ამომრჩეველს არჩევნებში მონაწილეობისკენ მოუწოდა.

"არჩევნებში ხმის მიცემა ნიშნავს, რომ ხმას აძლევ შენ მომავალს, შენი ახლობლებისა და მეგობრების კეთიდღეობას. ჩვენ აუცილებლად გავიმარჯვებთ 8 ოქტომბერს და მოვალთ ხელისუფლებაში ახალი ენერეგითა და იდეებით", - განაცხადა ენმ-ს ლიდერმა, დავით ბაქრაძემ.

პარტიის მხარდამჭერები ქუთაისიდან და იმერეთის სხვადასხვა რაიონებიდან ჩამოვიდნენ.

"სულ ნაციონალი ვარ ჩემი დღე და მოსწრება. ვენდობი ამ პარტიას. ქვეყანას წარმატებისკენ წაიყვანენ, რადგან დიდი გამოცდილება აქვთ", - ამბობს აქციის მონაწილე, ნანა სვინტრაძე.

"ნურავინ შეეცდება, არჩევნებში გამარჯვების შემთხვევაში, ჩაებღაუჭოს ხელისუფლებას უკანონოდ და ხალხის ნების გარეშე. 8 ოქტომბრიდან საქართველოს ეყოლება მხოლოდ ის ხელისუფლება, რომელსაც გადაწყვეტს ქართველი ხალხი და არა რომელიმე ერთი პირი, ვინც არ უნდა იყოს ის", - განაცხადა პარტიის ქუთაისის მაჟორიტარობის კანდიდატმა, აკაკი ბობოხიძემ.

მხარდამჭერებთან შეხვედრა "ნაციონალურმა მოძრაობამ" ქუთაისში, რუსთაველის გამზირზე, მერიის შენობასთან გამართა.

"ჩვენ ვცდილობდით ისეთი ადგილი შეგვერჩია, რომელიც ნაკლებად დისკომფორტის გამომწვევი იქნებოდა ქალაქისთვის, მაგრამ ეს შეთანხმება ვერ შედგა თვითმმართველობასთან, რომელმაც საგანგებო ღონისძიება დაგვიგეგმა იქ, სადაც პირველად ვიყავით შეჯერებული. აქ რამდენიმე საათით დაკავებული ადგილი ღირს იმად, რომ 8 ოქტომბრის შემდეგ მოქალაქეებს ჰქონდეთ საშუალება უკეთეს საქართველოში, უკეთეს ქუთაისში წინ წარმატებისკენ იარონ", - განაცხადა "ერთიანი ნაციონალური მოძრაობის" ქუთაისის ორგანიზაციის ხელმძღვანელმა, გია თევდორაძემ.