ქუთაისიპოსტი

ახალი რეპრესიული საკანონმდებლო ცვლილებების პირველი მოსმენით მიღების შემდეგ, "ქართული ოცნება", მედიის შესაზღუდად და ცენზურის დასაწესებლად, ახალი კანონის მიღებას გეგმავს.

ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ, დღეს გამართულ ბრიფინგზე, განაცხადა. 

მდინარაძის თქმით, მმართველი გუნდი ხვალიდან მუშაობას იწყებს და მალე დაინიცირდება „მედიის კანონი“, რომელსაც ბრიტანული მოდელისა და კანონმდებლობის შესაბამისად მიიღებენ.

მამუკა მდინარაძის განცხადებით, კანონით დადგინდება მედიის ობიექტურობის, აგრეთვე ჟურნალისტური ეთიკის სტანდარტები; განისაზღვრება აღნიშნული სტანდარტების მონიტორინგის და დაცვის ინსტიტუციური მექანიზმები; ამასთან, შეიზღუდება მედიასაშუალების დაფინანსება უცხოური წყაროებიდან (ეს არ შეეხება კომერციული რეკლამიდან მიღებულ და სხვა ამგვარ შემოსავლებს).

"ხვალიდანვე დავიწყებთ მუშაობას. ჩვენ ძალიან ზოგადად შეგვიძლია ვთქვათ, რომ BBC-ის სტანდარტად წოდებული ე.წ ნორმები ეს არის მოქმედი ნორმები ბრიტანეთში, დღეს. ჩვენ ამ შემთხვევაშიც, ბრიტანულ ნორმებთან შესატყვის და შესაბამის კანონმდებლობას შემოვიტანთ ქართული მედიაბაზრისათვის იმისათვის, რომ უზრუნველვყოთ ჩვენი მოქალაქეების სიცრუისგან დაცვა, უცხოური ჩარევის გარანტიები ავიღოთ მაქსიმალური და ეს იქნება ანალოგიური, როგორც ბრიტანული კანონმდებლობა. აქ ჩვენ, ყველა თქვენგანს, თუ სურვილი იქნება, ჩაგრთავთ",- განაცხადა მამუკა მდინარაძემ.