ქუთაისიპოსტი

29 დეკემბერს, პარლამენტში, „ქართულმა ოცნებამ“ პრეზიდენტის ინაუგურაცია გაიმართა. 
მეექვსე პრეზიდენტის ინაუგურაციის ცერემონია, რომელსაც სალომე ზურაბიშვილი, ოპოზიციური პარტიები და პროევროპული დემონსტრაციების მონაწილეები არალეგიტიმურად მიიჩნევენ, პარლამენტის თავმჯდომარემ, შალვა პაპუაშვილმა გახსნა.

ღონისძიება, რომელიც შალვა პაპუაშვილის ვარაუდით, დაახლოებით 40 წუთს უნდა გაგრძელებულიყო, 27 წუთს გაგრძელდა. 

მიხეილ ყაველაშვილმა საქართველოს პარლამენტში საპრეზიდენტო ფიცი დადო და სიტყვით მიმართა საზოგადოებას.

"ჩვენ უნდა ვიხელმძღვანელოთ მხოლოდ და მხოლოდ ჩვენი ეროვნული ინტერესებიდან გამომდინარე. ბოლო წლების განმავლობაში, რეგიონში და მსოფლიოში განვითარებული მოვლენების ფონზე, ჩვენ ქვეყანას არაერთ გამოწვევასთან მოუწია გამკლავება. მათ შორის ისეთ საფრთხეებთან, რომელიც გამანადგურებელი შედეგის მომტანი შეიძლება ყოფილიყო ჩვენი ქვეყნისთვის. ჩვენ ეს მოვახერხეთ ქართველი ხალხის და სახელმწიფოს ერთად დგომით. გადამწყვეტი როლი შეასრულა თავისუფლების მოყვარე ქართველი ადამიანის ხასიათმა, რომელიც არ ეგუება – ჩაგვრას, უსამართლობას, უპატივისმცემლობასა და ამპარტავნულ დამოკიდებულებას; რომელიც მოითხოვს პატივი სცენ ჩვენს ტრადიციებს, ღირებულებებს, ეროვნულ იდენტობას, ოჯახის სიწმინდეს, სარწმუნოებას და თანასწორად მოეპყრან ჩვენს სამშობლოს. სწორედ ასეთი – მტკიცე, შეუპოვარი ხასიათის დამსახურებით მოახერხა ქართველმა ხალხმა და სახელმწიფომ ამ უთანასწორო ბრძოლაში მშვიდობის შენარჩუნება, უსამართლობასთან და სიცრუესთან გამკლავება. თანაც ისე, რომ ვაგრეძლებთ ეკონომიკურ წინსვლას, განვითარებას, ჩვენი ქვეყნის გაძლიერებას და ევროპული ოჯახისკენ სვლას", -  თქვა მიხეილ ყაველაშვილმა  ინაუგურაციაზე.

მან ე.წ. ინაუგურაციაზე სიტყვით გამოსვლის დროს ერთხელაც არ ახსენა საქართველოს მთავარი პარტნიორი ევროკავშირი და ევროინტეგრაცია. ყაველაშვილმა ძირითადი აქცენტები ქართულ სუფრას, ტრადიციებს, მშვიდობასა და ოჯახის ღირებულებებს დაუთმო.

ინაუგურაციის პარალელურად, მეხუთე პრეზიდენტმა სალომე ზურაბიშვილმა ორბელიანების სასახლიდან განაცხადა, რომ რეზიდენციას ტოვებს, თუმცა კვლავ რჩება „ერთადერთ ლეგიტიმურ პრეზიდენტად“.