ქუთაისიპოსტი

მრავალფუნქციური სპორტის სასახლე და ავტოდრომი - ეს ის მორიგი დაპირებებია, რომლებიც ხელისუფლების პირველმა პირებმა, ქუთაისში, არჩევნებამდე რამდენიმე დღით ადრე გაახმოვანეს.
მმართველი პარტიის რეგიონულ ღონისძიებაზე, რომელიც, ქუთაისის სპორტის სასახლეში, 19 ოქტომბერს გაიმართა, იმერეთის მუნიციპალიტეტებიდან ჩამოყვანილ ხალხს სიტყვით ირაკლი კობახიძემ, ირაკლი ღარიბაშვილმა, ირაკლი ქარსელაძემ, მამუკა მდინარაძემ, შალვა პაპუაშვილმა, კახი კალაძემ და პარტიის საპატიო თავმჯდომარემ, ბიძინა ივანიშვილმა მიმართეს.

ჩამოთვლილთაგან კონკრეტული დაპირებები მხოლოდ პარტიის თავმჯდომარემ და საქართველოს პრემიერ-მინისტრმა ირაკლი კობახიძემ გააჟღერა, რომლის თქმითაც, ქუთაისის განვითარებას განსაკუთრებული ყურადღება დაეთმობა.

„მივიღეთ გადაწყვეტილება, რომ აშენდება მრავალფუნქციური სპორტის სასახლე, რაც, რა თქმა უნდა, ძალიან მნიშვნელოვანია ქუთაისელებისთვის და ქუთაისელი ახალგაზრდებისთვის.

ასევე, ჩვენ გვითხრეს რომ ქუთაისელ ახალგაზრდებში განსაკუთრებით არის ავტოდრომზე ძალიან დიდი მოთხოვნა და ამასთან დაკავშირებითაც მივიღეთ გადაწყვეტილება, მოეწყობა თანამედროვე სტანდარტების ავტოდრომი ქუთაისში“,- განაცხადა ირაკლი კობახიძემ, თუმცა როდის და კონკრეტულად რა ლოკაციაზე იგეგმება აღნიშნული ობიექტების მშენებლობა, არ დაუკონკრეტებია.

კობახიძის ამ დაპირებას გამოეხმაურა რეგიონული განვითარებისა და ინფრასტრუქტურის მინისტრი ირაკლი ქარსელაძეც, თუმცა პროექტის დეტალებზე არც მას უსაუბრია.

„მეგობრებო, საოცარია. ქუთაისს ექნება ახალი სპორტის სასახლე. ეს იქნება იმაზე მაგარი, ვიდრე არის ოლიმპიური აუზი, იმაზე მაგარი, ვიდრე არის შენგელიას სახელობის „ტორპედოს“ სტადიონი. ეს იქნება ახალი ჩემპიონების სამჭედლო და ის მომავალი, რასაც ჯანსაღი, ქართული, ტრადიციული, ეროვნული მომავალი ჰქვია“,- აღნიშნა ქარსელაძემ.

ამის შემდეგ საუბარი უკვე არსებულ ქუთაისის საერთაშორისო უნივერსიტეტისა და დავით აღმაშენებლის სახელობის აეროპორტის გაფართოების პროექტს შეეხო.

„ჩვენ გვაქვს მნიშვნელოვანი პროექტი, რომელიც უკავშირდება ქუთაისის საერთაშორისო აეროპორტს, რაც, რა თქმა უნდა, აისახება ქუთაისის, იმერეთის განვითარებაზე, ახალი სამუშაო ადგილების შექმნაზე.

მნიშვნელოვნად გაფართოვდება ბატონი ბიძინა ივანიშვილის მიერ დაფუძნებული ქუთაისის საერთაშორისო უნივერსიტეტი, სადაც 2028 წლისთვის სტუდენტების რაოდენობა 20 ათასს გადააჭარბებს. ამით, ქუთაისი გახდება ნამდვილი საუნივერსიტეტო ქალაქი და თბილისთან ერთად, მას ექნება თანაბარმნიშვნელოვანი საგანმანათლებლო კერის ფუნქცია ჩვენი ქვეყნისთვის. ეს ყველაფერი ქუთაისის განვითარებას სრულიად სხვა სტიმულს შესძენს“,- განაცხადა ირაკლი კობახიძემ.

ის მოკლედ შეეხო ქუთაისის პარლამენტის ყოფილ შენობაში ტექნოლოგიური ჰაბის მოწყობის საკითხსაც, იმ შენობაში, რომელსაც ფუნქცია წლების განმავლობაში ვერ მოუძებნეს, არჩევნებამდე რამდენიმე დღით ადრე კი ტექნოჰაბის ცენტრად გადაქცევა დაანონსეს და პრეზენტაციაც გამართეს.

„ჩვენ დავაანონსეთ, რომ ყოფილი პარლამენტის შენობაში უკვე მომავალ წელს გაიხსნება ტექნოლოგიური ჰაბი, სადაც განთავსდება უმაღლესი დონის ტექნოლოგიური ლაბორატორიები, საერთაშორისო IT-სკოლები, მსოფლიო დონის სამეცნიერო მუზეუმი და საერთაშორისო ტექნოლოგიური კომპანიების ოფისები, მაღალანაზღაურებადი სამუშაო ადგილები შეიქმნება მრავლად ამ პროექტის განხორციელებისთანავე ქუთაისში და მთლიანად იმერეთის რეგიონის მაცხოვრებელთათვის“,- განმარტა ირაკლი კობახიძემ.

მმართველი პარტიის ლიდერებმა არაერთხელ აღნიშნეს, რომ რეგიონული შეკრებების შემაჯამებელი ღონისძიება სიმბოლურია ქუთაისში რომ გაიმართა, საქართველოს სამეფოს ისტორიულ დედაქალაქში, საიდანაც დავით აღმაშენებელმა გააერთიანა საქართველო, თუმცა არაფერი უთქვათ გელათზე, რომელიც სწორედ მათი ხელისუფლებაში ყოფნის პერიოდში ინგრევა.

ასევე, არაფერი უთქვათ იმ დაპირებული პროექტების შესახებ: ელექტრომობილების ქარხანის, ელექტრობატარეების საწარმოს, „ოცნების“ ქალაქის, საპოლიციო ჰაბის შექმნასა და რიონისპირა სახლების რეაბილიტაციაზე, რომელსაც, ძირთადად, ასევე საარჩევნო პერიოდში გვპირდებოდნენ და რომელი პროექტებიც ამ დრომდე განუხორციელებელია.

„ოცნების“ ლიდერები წინასაარჩევნო ღონისძიებაზე საუბრობდნენ ქუთაისის, როგორც უძველესი ევროპული ქალაქის ისტორიასა და მნიშვნელობაზე, თუმცა არ უსაუბრიათ იმ პრობლემებზე, რომლებიც დღეს ამ ქალაქის მოსახლეობას აწუხებს, არც იმაზე, რომ ქუთაისმა მოსახლეობის რაოდენობით, მეორედან მეოთხე ადგილზე გადაინაცვლა.