ქუთაისიპოსტი

"თუ რამე ყოფილა ჩემს ბიოგრაფიაში გამორჩეული მიღწევა, ერთ-ერთი ყველაზე მნიშვნელოვანი არის ის, რომ მე ამხელა ქალაქი მოვიგე",- ამის შესახებ "ერთიანობა - ნაციონალური მოძრაობის" ლიდერმა ხატია დეკანოიძემ ქუთაისში, მხარდამჭერებთან შეხვედრისას, განაცხადა.

მან 2020-2021 წლის არჩევნები გაიხსენა და აღნიშნა, რომ ქუთაისი ყოველთვის იყო ოპოზიციური ქალაქი, ამიტომ გამარჯვების მოლოდინი რამდენიმე დღეში გასამართ საპარლამენტო არჩევნებზეც აქვს. 

"მე, თქვენთან ერთად, 2020-21 წლის არჩევნებზე ძალიან დიდი სიამაყის განცდა დამეუფლა. თუ რამე ყოფილა ჩემს ბიოგრაფიაში გამორჩეული მიღწევა, ყოველთვის როდესაც ვინმე მეკითხება, ერთ-ერთი ყველაზე მნიშვნელოვანი არის ის, რომ მე ამხელა ქალაქი მოვიგ,ე ძალიან ბევრ ადამიანთან ერთად. სხვათაშორის, როცა გამოაცხადა ცესკომ ციფრები, მაინც არ მჯეროდა, იმიტომ რომ ვერ გავიგე უცებ. მერე მივხვდი რომ პრაქტიკულად ამოტრიალდა ძალიან ბევრი რამ, იმიტომ რომ ჩვენ მოვიგეთ თვითმმართველი ქალაქები, დიდი ქალაქები. ამიტომ, დარწმუნებული ვარ, ახლაც იტყვის ქუთაისი თავის სიტყვას",- განმარტა ხატია დეკანოიძემ. 

მან საპარლამენტო არჩევნების მნიშვნელობაზეც ისაუბრა და განმარტა, რომ თითოეული ხმა ძალიან მნიშვნელოვანია, რადგან ეს არჩევნები გადის ჩვენი ქვეყნის კეთილდღეობასა და ევროპაზე.

"ყოველდღე, უამრავ ადამიანს ვხვდები და ყველა მეუბნება ერთს: ხო მოცილდებიან? კი, ოღონდ ამისთვის მნიშვნელოვანია, ხალხის მობილიზაცია იყოს მაქსიმალური. ეს ქალაქი ყოველთვის იყო იმ მოწოდების სიმაღლეზე, ერთადერთი რამაც დამამწუხრა არის ის, რომ ქუთაისი დაიცალა. რომ შევდივარ კორპუსებში, შეიძლება 4 ან 5 ფანჯარა იყოს ანთებული. ამიტომ, 26 ოქტომბერს, ჩვენ, ყველანი ერთად დავირაზმებით, იმისთვის რომ თქვენთან ერთად გადავარჩინოთ ეს ქვეყანა. გპირდებით, რომ მე და ჩემი მეგობრები თავს არ დავზოგავთ, იმისთვის რომ ხმებიც დავიცვათ და ჩვენი მომავალიც",- მიმართა ხატია დეკანოიძემ ადგილობრივებს. 

ის, ქუთაისში, მისი და გიგი უგულავას მიერ "ოცნების" ბანერის "არა ომს, აირჩიე მშვიდობა" შეღებვასაც გამოეხმაურა და განაცხადა, რომ ეს იყო არა სპონტანური, არამედ ნაფიქრი გადაწყვეტილება, რომელიც, პირველად, სწორედ ქუთაისში უნდა განხორციელებულიყო.

"კი, სამარცხვინო ბანერი სწორედ ქუთაისში უნდა შეღებილიყო, პირველი უნდა ყოფილიყო ქუთაისი. ეს იყო ჩემი და გიგის გადაწყვეტილება. დიდი ხანია ამაზე ვფიქრობთ, ამიტომ ეს არ იყო სპონტანური, ეს იყო რაციონალური ნაფიქრი, იმიტომ რომ ჩვენ ვართ პირველ რიგში ადამიანები, ქართველები და ქართველების ღირსეული ტრადიცია არის ის, რაც ეკადრება ქუთაისს",- აღნიშნა ხატია დეკანოიძემ.

მან შეხვედრის ბოლოს იმედი გამოთქვა, რომ დადგება დრო, როცა მიეცემათ შესაძლებლობა, ქუთაისის განვითარებაზე ერთად ისაუბრონ ბევრი და არა იმაზე, როგორ გადარჩეს ახლა ქალაქი. 

"მე დიდი იმედი მაქვს, რომ დადგება დრო და მომენტი, როცა ჩვენ მოგვცემა შესაძლებლობა, სრულიად სხვა თემებზე ვილაპარაკოთ. ვილაპარაკოთ ქალაქებზე, იმაზე, ავირჩიოთ თუ არა შერიფი ქუთაისში, გავზარდოთ თუ არა ქუთაისის ბიუჯეტი და როგორ უნდა გავზარდოთ. განათლების ჰაბად როგორ გადავაქციოთ და არ გვექნება სალაპარაკო მხოლოდ იმაზე, როგორ გადავრჩეთ",- განაცხადა ხატია დეკანოიძემ.

"ერთიანობა ნაციონალური მოძრაობის" ლიდერები, ხატია დეკანოიძე, გიგი უგულავა და გია ჯაფარიძე, გუშინ, 17 ოქტომბერს, საგანმანათლებლო სექტორის წარმომადგენლებსა და მხარდამჭერებს შეხვდნენ.

მათ სასტუმრო "სოლომონში" ქუთაისის ევროპული მომავლის ქალაქის შესახებ ესაუბრნენ, ასევე, მომავალი საპარლამენტო არჩევნების მნიშვნელობაზე.

შეხვედრის შემდეგ, საქართველოს მესამე პრეზიდენტის, მიხეილ სააკაშვილის წიგნის "ძალის გამოღვიძება" პრეზენტაცია გაიმართა. წიგნი დამსწრე საზოგადოებას თავად ექსპრეზიდენტის დედამ, გიული ალასანიამ წარუდგინა.