ქუთაისიპოსტი

ქუთაისის საერთაშორისო აეროპორტის ახალი, 3,5 კმ-იანი ასაფრენ-დასაფრენი ზოლისა და სააეროდრომო ინფრასტრუქტურის მშენებლობა იწყება.

მშენებლობის დაწყებასთან დაკავშირებით, აეროპორტში სიმბოლური კაფსულა საქართველოს პრემიერ-მინისტრმა, ირაკლი კობახიძემ, ეკონომიკის მინისტრმა, ლევან დავითაშვილმა, აეროპორტების გაერთიანების დირექტორმა, ირაკლი ქარქაშაძემ და სამშენებლო კომპანია „ანაგის“ დირექტორმა, ირაკლი გოგოლაშვილმა ჩაუშვეს. 

ირაკლი კობახიძის განცხადებით, ქუთაისის საერთაშორისო აეროპორტს დიდი წვლილი შეაქვს იმერეთის და მთლიანად საქართველოს ავიაციის, ტურიზმისა და ეკონომიკის განვითარებაში, ამიტომ, აეროპორტის ინფრასტრუქტურის მოდერნიზებას მომავალშიც ასეთივე განსაკუთრებულ ყურადღებას დაუთმობენ.

"ახალი ზოლი უმაღლესი საერთაშორისო სტანდარტების შესაბამისად აშენდება, აღჭურვილი იქნება მაღალი სიზუსტის თანამედროვე სანავიგაციო შუქ-ტექნიკით და ნებისმიერი ზომის სამგზავრო და სატვირთო საჰაერო ხომალდების შეუზღუდავი მომსახურების შესაძლებლობა ექნება.

პროექტის დასრულების შემდეგ ჩვენ გვექნება თანამედროვე, საერთაშორისო სტანდარტების შესაბამისად სრულად აღჭურვილი აეროპორტი, რომელიც კიდევ უფრო დიდ სტიმულს მისცემს ტურიზმისა და შესაბამისად, ეკონომიკის ზრდას ჩვენს ქვეყანაში, რაც საბოლოო ჯამში, ჩვენი მოსახლეობის კეთილდღეობაზე აისახება,“- განაცხადა პრემიერმა.

მისივე თქმით, პროექტში, რომელიც ქუთაისის საერთაშორისო აეროპორტის განვითარების გენერალური გეგმის პირველ ფაზას წარმოადგენს, 240 მილიონი ლარის ინვესტიცია ჩაიდება.

"ეს აღემატება ამ აეროპორტში აქამდე განხორციელებული ყველა ინვესტიციის ჯამს ერთად აღებულს, ჯამურად, აქამდე 200 მილიონის ინვესტიცია იყო ჩადებული ამ აეროპორტში და ახლა, მხოლოდ ამ პროექტის ფარგლებში, 240 მილიონი ლარის ინვესტიცია განხორციელდება",- განაცხადა ირაკლი კობახიძემ.

პროექტს სამშენებლო კომპანია „ანაგი“ განახორციელებს და მისი დასრულება 2026 წლის გაზაფხულზე იგეგმება, რის შემდეგაც, ქუთაისის საერთაშორისო აეროპორტი იქნება ერთადერთი აეროპორტი საქართველოში, რომელიც დიდი ზომის საჰაერო ხომალდების მიღებას შეზღუდვების გარეშე შეძლებს.

დღეისათვის, დავით აღმაშენებლის სახელობის აეროპორტი D კოდით ოპერირებს. მისი ასაფრენ-დასაფრენი ზოლის (ადზ) სიგრძე 2,5 კმ-ს შეადგენს, რაც საშუალო ზომის საჰაერო ხომალდების ოპერირებას უზრუნველყოფს.

ირაკლი კობახიძის თქმით, ქუთაისის აეროპორტის განვითარების შემდეგ ეტაპზე, გაფართოვდება სამგზავრო ტერმინალი, შედეგად, მგზავრთნაკადი ამ აეროპორტში 1.7 მილიონიდან ხუთ მილიონამდე გაიზრდება.