ქუთაისიპოსტი

„ერთიანობა-ნაციონალური მოძრაობის” მოძრაობის ლიდერები ქუთაისში ამომრჩევლებს შეხვდნენ და წინასაარჩევნო დაპირებები გააცნეს.
ენმ-ს ერთ-ერთი ლიდერის, გიორგი ვაშაძის განცხადებით, მას შემდეგ, რაც ხელისუფლებაში "ნაციონალური მოძრაობა" კოალიციური მმართველობით მოვა, ქუთაისი ლოჯისტიკური და სატრანსპორტო ჰაბი გახდება. ამ მიზნით, როგორც ვაშაძემ აღნიშნა, ქალაქის საერთაშორისო აეროპორტის ტერიტორიაზე სამგზავრო და სატვირთო ტერმინალი აშენდება.

“როგორც კი გავიმარჯვებთ, ჩვენ შეგვიძლია ევროკავშირიდან მოვიზიდოთ 14 მილიარდი ევრო. აქედან, მნიშვნელოვანი ნაწილი წავა საქართველოს ლოჯისტიკური ინფრასტრუქტურის განვითარებაზე. აქ გვაქვს გამოტანილი ქუთაისის სატვირთო ტერმინალის განვითარების პროექტი, რომელიც, სამწუხაროდ, “ქართულმა ოცნებამ” შეწყვიტა ისევე, როგორც ბევრი რამ გაუჩერებია. ჩვენ ვამბობთ, რომ ამ 14 მილიარდი ევროდან თანხას მოვახმართ ქუთაისის აეროპორტის სამგზავრო ტერმინალის გარდა, სატვირთო ტერმინალის განვითარებას, რომელიც შექმნის ათასობით თუ არა ათი ათასობით მაღალანაზღაურებად სამუშაო ადგილს",- აღნიშნა მან.

გიორგი ვაშაძის თქმით, ეს იქნება ერთ-ერთი ყველაზე დიდი ლოჯისტიკური კვანძი, სატვირთო ტერმინალი, რომელიც დააკავშირებს ევროპას და აზიას ერთმანეთთან, ამასთან, განავითარებს რეგიონს და "ერთხელ და სამუდამოდ დამთავრდება უმუშევრობის პრობლემა იმერეთსა და დასავლეთ საქართველოში".

ენმ-ს ლიდერის განცხადებით, ქუთაისში, მოსახლეობასთან შეხვედრისას გამოიკვეთა, რომ ქალაქში პროდასავლური და პროევროპული განწყობაა.

გიორგი ვაშაძე დარწმუნებულია, რომ ქუთაისში "ქართული ოცნება" 20%-საც ვერ აიღებს, რადგან, როგორც აღნიშნა, ეს არის ქალაქი, რომელიც "პირველი შეაბიჯებს ევროკავშირში თავისი ღირსებით და დაიბრუნებს საპარლამენტო დედაქალაქის სტატუსს".

ქუთაისში რომ მოსახლეობა ცვლილებებისთვის მზად არის, ამაზე ისაუბრა "ევროპული საქართველოს" ერთ-ერთმა ლიდერმა გიგი წერეთელმაც. 

"ადამიანები ელოდებიან იმას, რომ ქვეყანა დაიწყებს უკეთეს ცხოვრებას, იქნება გაცილებით მაღალი სტანდარტი მომავალ წლებში და არ იქნება ის ქაოსი, რომელსაც დღეს ხელისუფლება გვპირდება. ამიტომ, ამოცანა, რასაც კარგად ხვდება ჩვენი ამომრჩეველი ქუთაისშიც და ყველგან, ეს არის კეთილდღეობისკენ ნაბიჯების გადადგმა ამ არჩევნების შემდეგ. ეს ცვლილებები უნდა იყოს და ვფიქრობ, რომ ქუთაისი დიდ წვლილს შეიტანს ამ საქმეში, როგორც მომავალი პოლიტიკური ცენტრი, რადგან ჩვენ ის ისევ უნდა ვაქციოთ პოლიტიკურ და კულტურულ ცენტრად ჩვენი ქვეყნისა", - განაცხადა გიგი წერეთელმა.  

კოალიციაში “ერთიანობა – საქართველოს გადარჩენისთვის” "სტრატეგია აღმაშენებელი", "ნაციონალური მოძრაობა" და "ევროპული საქართველოა" გაერთიანებული. მათი საარჩევნო ნომერია 5.

26 ოქტომბერს საქართველოში, მორიგი საპარლამენტო არჩევნები გაიმართება, რომელსაც ქვეყნის დემოკრატიული განვითარებისა და ევროკავშირში ინტეგრაციის თვალსაზრისით გადამწყვეტი როლი ენიჭება.

აღსანიშნავია, რომ ეს არჩევნები იქნება პირველი საპარლამენტო არჩევნები საქართველოს ისტორიაში, რომელიც ევროკავშირის წევრობის კანდიდატი ქვეყნის სტატუსის ქვეშ გაიმართება.