ქუთაისიპოსტი

კოალიცია "ძლიერი საქართველოს" ლიდერები, საარჩევნო კამპანიის ფარგლებში, დღეს, ქუთაისის მოსახლეობას შეხვდნენ და თავიანთი წინასაარჩევნო გეგმა გააცნეს.

როგორც კოალიციის ერთ-ერთმა ლიდერმა ბადრი ჯაფარიძემ განაცხადა, ქუთაისის მაგალითზე კარგად ჩანს "ქართული ოცნების" 12-წლიანი მართვის შედეგები - ის, რომ ქალაქი დაცლილია და სრულიად უფუნქციოდაა დარჩენილი. 

"ქუთაისის მოსახლეობის დიდი ნაწილი წასვლაზე ფიქრობს. ჩვენ გვაქვს, ფაქტობრივად, კატასტროფის წინაშე მყოფი ქალაქი, რომელიც იყო და უნდა გახდეს კვლავ საქართველოს კულტურული, ინდუსტრიული და განათლების ცენტრი. ეს არის ჩვენი ამოცანა", - განმარტა ბადრი ჯაფარიძემ. 

მან მოსახლეობას ის დაპირებებიც გააცნო, რომელსაც არჩევნებში გამარჯვების შემდეგ შეასრულებს. კერძოდ, ჯაფარიძის თქმით, იმ 200 000 სამუშაო ადგილიდან, რომელიც მათი კოალიციის ერთ-ერთი მთავარი დაპირებებაა, მნიშვნელოვანი ნაწილი, ღირსეული ანაზღაურებით ქუთაისში იქნება შექმნილი. ამასთან, პენსიონერებს პენსია 1000 ლარამდე გაეზრდებათ.

კოალიცია "ძლიერი საქართველოს" ლიდერმა იმ მნიშვნელოვანი ფუნქციების შესახებაც ისაუბრა, რასაც ქუთაისი მათი არჩევნებში გამარჯვების შემდეგ დაიბრუნებს. 

"ქუთაისს აქვს უნიკალური შანსი, გახდეს ე.წ ლოგისტიკური ჰაბი. ანუ, გამომდინარე ქალაქის მდებარეობიდან, ის შეიძლება გახდეს რეგიონალური მნიშვნელობის სატრანსპორტო ჰაბი და ჩვენ ამას ვუზრუნველყოფთ. ვფიქრობ, ყველა რესუსრსი აქვს ქუთაისს ამისათვის. ასევე, დასრულდება მეგაპროექტები, მათ შორის ანაკლია, რომლის სიკეთეც პირდაპირ აისახება ქუთაისზე. 
ამისთვის სჭირდება პასუხისმგებლიანი, პროდასავლური, კოალიციური, ეროვნული ხელისუფლება და არა ხელისუფლება, რომელიც ემსახურება რუსეთს",- აღნიშნა ბადრი ჯაფარიძემ. 

ჩვენ მიერ დასმულ კითხვაზე, იქნება თუ არა კოალიცია "ძლიერი საქართველოსთვის" მთავარი პრიორიტეტი ქუთაისისთვის საპარლამენტო ქალაქის სტატუსის დაბრუნება, ბადრი ჯაფარიძემ განაცხადა, რომ "მნიშვნელოვანია ქუთაისის ფუნქციისთვის პარლამენტის დაბრუნებაზეც ვიფიქროთ".

კოალიცია “ძლიერი საქართველოს” შემადგენლობაში არიან პარტიები – “ლელო”, ანა დოლიძე – ხალხისთვის”,  “მოქალაქეები” და პოლიტიკური მოძრაობა "თავისუფლების მოედანი".

26 ოქტომბერს, საქართველოში, მორიგი საპარლამენტო არჩევნები გაიმართება, რომელსაც ქვეყნის დემოკრატიული განვითარებისა და ევროკავშირში ინტეგრაციის თვალსაზრისით გადამწყვეტი როლი ენიჭება.

აღსანიშნავია, რომ ეს არჩევნები იქნება პირველი საპარლამენტო არჩევნები საქართველოს ისტორიაში, რომელიც ევროკავშირის წევრობის კანდიდატი ქვეყნის სტატუსის ქვეშ გაიმართება.