ქუთაისიპოსტი

საქართველოს პარლამენტში „უცხოური გავლენის გამჭვირვალობის შესახებ“ კანონპროექტის, იგივე რუსული კანონის მეორე მოსმენით განხილვა დაიწყო. 
იურიდიულ კომიტეტზე განხილვა ხმაურით დაიწყო. კომიტეტის ხელმძღვანელმა ანრი ოხანაშვილმა რამდენიმე ოპოზიციონერ დეპუტატს მიკროფინი გაუთიშა. 

ოპოზიციონერ დეპუტატებს ჰქონდათ შეთავაზება, რომ დღეს სხდომა გადადებულიყო, თუმცა იურიდიულ საკითხთა კომიტეტის  თავმჯდომარემ ანრი ოხანაშვილმა განაცხადა, რომ პროცედურასთან დაკავშირებით კითხვები არ არის და შესაბამისად, კანონპროექტს დღეს განიხილავენ. 

კანონპროექტის განხილვის შემდეგ ''ქართული ოცნება'' აქციას აანონსებს. თბილისის გარდა, აქციას სხვადასხვა ქალაქებიდან და რეგიონებიდან უერთდებიან, მათ შორის, ქუთაისიდანაც.

აქტივისტების გარდა, ქუთაისიდან და ზოგადად, იმერეთის რეგიონიდან აქციაზე წასასვლელად თანამდებობის პირებიც ემზადებიან. ისინი დაუფარავად ამბობენ, რომ სამუშაო დღეს არა სამსახურებში, არამედ „უცხოური გავლენის გამჭვირვალობის შესახებ“ კანონპროექტის მხარდასჭერად მიდიან, რომელიც 29 აპრილს, პარლამენტში მეორე მოსმენაზე უნდა გაიტანონ.

"ქართულმა ოცნებამ", 29 აპრილს, საქართველოს პარლამენტის სასახლის წინ, რუსულ კანონთან დაკავშირებით საყოველთაო-სახალხო შეკრება დაანონსა. ცნობილია ისიც, რომ აქციას დაესწრება თავად ბიძინა ივანიშვილიც.

საქართველოს პარლამენტის თავმჯდომარემ შალვა პაპუაშვილმა განმარტა, რომ „მნიშვნელოვანია 29 აპრილს, დიდიც და პატარაც, ქალიც და კაციც, საჯარო მოხელეც და ბიზნესმენიც, ქუდზე კაცი გამოვიდეს რუსთაველზე", რისთვისაც ხელისუფლება მუქარითა თუ მოსყიდვით ყველა რესურს იყენებს. 

ათიათასობით მოქალაქის წინააღმდეგობის მიუხედავად, „უცხოური გავლენის გამჭვირვალობის შესახებ“ კანონპროექტი პარლამენტმა პირველი მოსმენით 17 აპრილს მიიღო. კანონპროექტს მხარი 83-მა ადამიანმა დაუჭირა.

„უცხოური გავლენის გამჭვირვალობის შესახებ“ კანონპროექტი, რომელიც ფრაქცია "ქართული ოცნების" სახელით არის რეგისტრირებული, შინაარსით გასულ წელს ინიცირებული და საპროტესტო აქციების შედეგად გაწვეული პროექტის ანალოგიურია.

კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ „უცხოური ძალის ინტერესების გამტარებლის“ სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.