ქუთაისიპოსტი

ქუთაისის მაჟორიტარი დეპუტატი ზაზა ლომინაძე ქუთაისში მესამე სექტორისა და მედიის წარმომადგენლების მოწვევას იღებს.

მაჟორიტარის ბიუროში ''ქუთაისიპოსტს'' განუმარტეს, რომ ზაზა ლომინაძე მედიისა და არასამთავრობო ორგანიზაციების წარმომადგენლებს აუცილებლად შეხვდება, თუმცა ის ამ დროისთვის მივლინებაში იმყოფება. 

''ამ დროისთვის ბათუმში, ჯანმრთელობის დაცვისა და სოციალურ საკითხთა კომიტეტის გასვლით სხდომაზე იმყოფება, რომელიც 3-4 დღის მანძილზე გაგრძელდება.  როცა ქალაქში ჩამოვა,  აქვს სურვილი მედიებსა და არასამთავრობოებს შეხვდეს. კონკრეტულად სად და როდის გაიმართება შეხვედრა, ამის შესახებ მაჟორიტარის ქალაქში ჩამოსვლის შემდეგ გავავრცელებთ განცხადებას,'' -განმარტავენ მაჟორიტარის ბიუროში. 

ზაზა ლომინაძე ერთ-ერთია იმ 83 დეპუტატს შორის, ვინც რუსულ კანონს პირველივე მოსმენაზე მხარი დაუჭირა. შესაბამისად, ქალაქში მოქმედი მედიებისა და არასამათავრობო ორგანიზაციების წარმომადგენლებს ქალაქის მაჟორიტართან კონკრეტული კითხვები აქვთ, რატომ უჭერს იმ კანონს მხარს, რომელიც  გამოხატვის თავიუფლებას ზღუდავს და ქვეყნის ევროინტერგრაციას ეწინააღმდეგება. 

''ჩვენ, არასამთავრობო და მედია ორგანიზაციები, კატეგორიულად ვეწინააღმდეგებით ინიცირებულ კანონპროექტს, რომელიც პარლამენტმა მიმდინარე წლის 17 აპრილს პირველი მოსმენით მიიღო. „უცხოური გავლენის გამჭვირვალობის შესახებ“ კანონპროექტის ერთ-ერთი პირველი მხარდამჭერი ხართ თქვენ. თქვენგან, როგორც ჩვენი წარმომადგენელი პარლამენტში, ველით კონსტრუქციულ დისკუსიას.

ჩვენ იმერეთში, ქუთაისში მოქმედი არასამთავრობო და მედია ორგანიზაციები ვთვლით, რომ ეს კანონპროექტი თქვენი მხრიდან არ უნდა იყოს მხარდაჭერილი და რომ თქვენ ჩვენი ინტერესები არ გაატარეთ.

მკაფიოდ გვსურს გითხრათ, რომ ეს კანონპროექტი არ არის ჩვენი არჩევანი და იგი უნდა იყოს გაწვეული პარლამენტიდან",- ნათქვამია მედია და არასამთვრობო ორგანიზაციების ერთობლივ განცხადებაში, რომელიც 20 აპრილს ზაზა ლომინაძეს მეილზე გაეგზავნა. 

საზოგადოების პროტესტის მიუხედავად, „ქართულმა ოცნებამ“ რუსული კანონი, პირველი მოსმენით, 17 აპრილს მიიღო. ჯამში სამი მოსმენაა საჭირო. 

„უცხოური გავლენის გამჭვირვალობის შესახებ“ კანონპროექტი, რომელიც ფრაქცია "ქართული ოცნების" სახელით არის რეგისტრირებული, შინაარსით გასულ წელს ინიცირებული და საპროტესტო აქციების შედეგად გაწვეული პროექტის ანალოგიურია.

კანონპროექტის მიხედვით, ორგანიზაციებს, რომლებიც დაფინანსების 20%-ზე მეტს უცხოეთიდან იღებენ, „უცხოური ძალის ინტერესების გამტარებლის“ სტატუსი მიენიჭებათ. კანონპროექტი უცხოური ძალის ინტერესების გამტარებელ ორგანიზაციად რეგისტრაციის ვალდებულებას ადგენს, რომლის დარღვევისთვის ფინანსური სანქციებია გათვალისწინებული.

ანალოგური შინაარსის კანონი რუსეთშიც მოქმედებს, რაც დამოუკიდებელი მედიასაშუალებებისა და საზოგადოებრივი ორგანიზაციების ფაქტობრივი გაქრობის მიზეზი გახდა.

ამ კანონს, რომლის მიზანიც ქვეყანაში დასავლური დაფინანსების მქონე ორგანიზაციების დისკრედიტაცია და შეზღუდვაა, საქართველოში არაერთი საზოგადოებრივი ჯგუფი ეწინააღმდეგება. ამასთან, წინააღმდეგია აშშ, ევროკავშირი და არაერთი დასავლური ორგანიზაცია.