ქუთაისიპოსტი

ჭორვილაში ჩასულ „ნაციონალური მოძრაობის“ წევრებსა და მხარდამჭერებს სოფელში შესვლის საშუალება არ მისცეს.

ადგილობრივებმა მათ გზა სოფლის გადასახვევთან გადაუკეტეს, რასაც სიტყვიერი და ფიზიკური დაპირისპირება მოჰყვა. სოფლის მოსახლეობა აქციის მონაწილეების მისამართით კვერცხებსა და ქვებს ისვრის.

„ეს არის ჩვენი ხელისუფლება, რომელიც გვიკრძალავს, მშვიდად გადავაადგილდეთ ჩვენივე ქვეყანაში. ამ წუთებში ისვრიან ქვებს, ეს არის რუსი ოლიგარქის რეჟიმი და დიახ, იმიტომ ვართ აქ ჩამოსულები, რომ აქედან დავიწყებთ მსვლელობას, მივალთ ყველგან და ყველას გავაგებინებთ, რომ ვერ გაარუსებენ ჩვენს ქვეყანას, ქართველებს რუსებით ვერ შეცვლიან“,- ამბობს მიხეილ სააკაშვილის წარმომადგენელი სოფო ჯაფარიძე.

ადგილზე სამართალდამცველები არიან მობილიზებული.

პოლიციამ დაპირისპირებამდე ჟურნალისტებს ჭორვილამდე მისასვლელი გზა ჩაუკეტა და პროფესიული მოვალეობის შესრულების უფლებას არ აძლევდა.

საქართველოს მესამე პრეზიდენტის მხარდამჭერები, თბილისში, ევროპის მოედანზე, დილით შეიკრიბნენ და სოფელ ჭორვილას მიმართულებით მსვლელობით დაიძვრნენ.

ისინი აქციის მიზეზად ივანიშვილის არაფორმალური მმართველობის გაპროტესტებას ასახელებენ.


ამავე თემაზე:

ჭორვილა გადაკეტილია - სოფლის ორივე შესასვლელთან პოლიციაა მობილიზებული