ქუთაისიპოსტი

ამერიკის შეერთებული შტატების პრეზიდენტი ჯო ბაიდენი აცხადებს, რომ  ომის დანაშულებებისთვის,  რომელიც ვლადიმირ პუტინმა უკრაინაში ჩაიდინა, საჭიროა მის წინააღმდეგ სასამართლო ჩატარდეს.
ბაიდენმა, ასევე ამერიკის მხრიდან დამატებითი სანქციებიც დაანონსა.

"თქვენ ნახეთ რაც მოხდა ბუჩაში... ის [პუტინი] ომის დამნაშავეა. ჩვენ უნდა გავაგრძელოთ უკრაინისთვის იარაღის მიწოდება და მათ უნდა განაგრძონ ბრძოლა. ასევე, ერთად უნდა შევაგროვოთ დეტალები, რათა შევძლოთ ნამდვილი ომის დანაშაულებების შესახებ სასამართლოს მოწყობა", - თქვა ბაიდენმა.

"თუმცა, ამერიკის პრეზიდენტმა მომხდარისთვის გენოციდის წოდებისგან თავი შეიკავა", - წერს  "ამერიკის ხმა". 

კიევთან ახლოს მდებარე ტერიტორიიდან, ჯარისკაცებმა 410 სამოქალაქო პირის  ცხედარი გაიტანეს. ვრცელდება ნაწამები, გაუპატიურებული, გაკოჭილი და შემდეგ მოკლული კაცების, ქალებისა და ბავშვების ფოტო-ვიდეო მასალაც.

უკრაინაში 41-ე დღეა ომია. 24 თებერვალს, რუსეთმა სრულმასშტაბიანი ომი გამოუცხადა უკრაინას. რუსული ჯარები ბომბავენ და ანგრევენ ინფრასტრუქტურას, ახორციელებენ მასიურ დაბომბვას უკრაინის ქალაქებისა და დაბების საცხოვრებელ უბნებზე, საარტილერიო, სარაკეტო ტყვიის და ბალისტიკური რაკეტების გამოყენებით.

უკრაინის თავდაცვის სამინისტრომ 2 აპრილს განაცხადა რუსეთის არმიისგან კიევის ოლქის სრული გათავისუფლების შესახებ. მომდევნო დღეს მსოფლიოს მასმედია მოიარა კადრებმა, რომლებიც საერთაშორისო სააგენტოების ჟურნალისტებმა გადაიღეს კიევის შემოგარენში, იმ რაიონებში, რომლებიც ერთი თვის განმავლობაში იყო რუსეთის მიერ ოკუპირებული.

ამ პატარა ქალაქებში იპოვეს მრავალი მშვიდობიანი მოქალაქის გვამი, ბევრ მათგანს ხელები ზურგს უკან ჰქონდა შეკრული. ისინი თავში გასროლით არიან მოკლული. როგორც უკრაინული მხარე იტყობინება, წასვლამდე რუსეთის ჯარები შეეცადნენ ზოგიერთი გვამის დაწვას. აღმოჩენილია ძმათა სასაფლაოები.