ქუთაისიპოსტი

ჩვენ უნდა შევინარჩუნოთ ჩვენი ქვეყნის დამოუკიდებლობა და უნდა შევქმნათ ქვეყანა, რომელშიც თავისუფალი მოქალაქეები მისცემენ მომავალ თაობებს მიღწევებს, როგორც ეს ჩვენს წინაპრებს მიუციათ მთელი კაცობრიობისთვის, - ამ სიტყვებით მიმართა საქართველოს პრეზიდენტმა, გიორგი მარგველაშვილმა თავისუფლების მოედნიდან საქართველოს მოსახლეობას.

პრეზიდენტმა საზეიმო ღონისძიებაზე სიტყვით გამოსვლისას საქართველოს მეგობარი ქვეყნების წარმომადგენლებს მადლობა გადაუხადა.

"დღევანდელ დღეს ვულოცავ ჩვენს მეგობრებს და მადლობას ვუხდი მათ იმისთვის, რომ ჩვენთან ერთად დგანან და იმისთვის, რომ ამ რთულ ვითარებაში ისინი ამტკიცებენ მხარდაჭერას ჩვენი ქვეყნისთვის. ასეთი წარმომადგენლობითი დელეგაციები, რაც დღეს საქართველოშია, აქამდე არ ყოფილა და ჩვენ დარწმუნებული ვართ, რომ ეს იმ გამარჯვებების საწინდარია, რომელიც ჩვენს სტრატეგიულ მიზნამდე, ნატო-სა და ევროკავშირის წევრობამდე მიგვიყვანს. დღევანდელ დღეს ვულოცავ პრემიერს, მთავრობას და მმართველ პარტიას, ვულოცავ ყველა ოპოზიციურ პარტიას და საზოგადოებრივ გაერთიანებას, რადგან ჩვენ დემოკრატიას სწორედ ეს მრავალფეროვნება ქმნის. ჩვენ ამ სიძლიერით ვაძლიერებთ დემოკრატიულ საქართველოს. მინდა მასმედიას მივულოცო დღევანდელი დღე, ვინაიდან დემოკრატია თქვენი თავისუფლების გარეშე ვერ შედგებოდა.

საქართველოს ყველა მოქალაქეს გილოცავთ ამ მნიშვნელოვან თარიღს. დღეიდან ჩვენ გადავაბიჯებთ ჩვენი რესპუბლიკის ახალ ასწლეულში და მომავალ 100 წელს გავივლით ისევე, იმ პრინციპებით და ღირებულებებით, რაც ჩვენს წინაპრებს გაუვლიათ. აქ მიზანი ნათელია - ჩვენ უნდა შევინარჩუნოთ ჩვენი ქვეყნის დამოუკიდებლობა და უნდა შევქმნათ თავისუფალი ქვეყანა, რომელშიც თავისუფალი მოქალაქეები, მათი მრავალხმრივი ნიჭის განვითარება გააძლიერებს ჩვენს სამშობლოს და ისევე მისცემს მომავალ თაობებს მიღწევებს, როგორც ეს ჩვენს წინაპრებს მიუციათ მთელი კაცობრიობისთვის. დღევანდელი მდგრადობა ჩვენი ერის ნათლად მაჩვენებს, რომ ჩვენი ქვეყანა გამარჯვების გზაზე დგას და ამიერიდან მხოლოდ გამარჯვების გზით ივლის. ღმერთი გფარავდეთ თქვენ და ღმერთი ფარავდეს საქართველოს", - განაცხადა პრეზიდენტმა.

2018 წლის 26 მაისს საქართველოს დამოუკიდებლობის გამოცხადებიდან 100 წელი სრულდება. 1918 წლის 26 მაისს, საქართველოს პირველმა რესპუბლიკამ, ნოე ჟორდანიას თავმჯდომარეობით, დამოუკიდებლობა გამოაცხადა.

interpressnews.ge