ქუთაისიპოსტი

საქართველოს განათლებისა და მეცნიერების სამინისტროში აცხადებენ, რომ ყოველგვარი ქმედება, რომელიც ახალგაზრდების სიტყვის თავისუფლების შეზღუდვისკენ იქნება მიმართული, მათთვის მიუღებელია.
„პირველ რიგში, გვსურს აღვნიშნოთ, რომ სამინისტროს ერთ-ერთი პრიორიტეტია სტუდენტთა ხელშეწყობა და მათთვის თანასწორი, თავისუფალი და ჯანსაღი საგანმანათლებლო გარემოს უზრუნველყოფა. შესაბამისად, უწყებისთვის მიუღებელია ყოველგვარი ქმედება, რომელიც ახალგაზრდების შევიწროებისკენ და სიტყვის თავისუფლების შეზღუდვისკენ იქნება მიმართული“, - ვკითხულობთ სამინისტროს განცხადებაში.

განათლების უწყება კონკრეტული მედიასაშუალებების მიერ გავრცელებულ ინფორმაციას აქციის მონაწილე სტუდენტთა სამინისტროში დაბარების თაობაზეც ეხმაურება.

„სხვადასხვა მედიასაშუალების მიერ გავრცელებული ინფორმაცია იმის შესახებ, რომ თითქოს მოხდა სტუდენტთა დაბარება სამინისტროში – სიმართლეს არ შეესაბამება. ამასთან დაკავშირებით მოგახსენებთ, რომ სტუდენტებმა თავად გამოთქვეს საქართველოს განათლებისა და მეცნიერების მინისტრის მოადგილე ნუნუ მიცკევიჩთან შეხვედრის სურვილი. მხოლოდ ამის შემდეგ, სტუდენტების მოთხოვნის საფუძველზე, მინისტრის მოადგილემ გამოთქვა ახალგაზრდებთან შეხვედრის მზაობა.

კიდევ ერთხელ აღვნიშნავთ, რომ საქართველოს განათლებისა და მეცნიერების სამინისტროსთვის განათლების სისტემის და მასთან დაკავშირებული საკითხების პოლიტიზირება და პოლიტიკური ინტერესებისთვის გამოყენების მცდელობა კატეგორიულად მიუღებელია“, - აღნიშნულია განცხადებაში.

აღსანიშნავია, რომ დღეს "ქართული ოცნების" თავმჯდომარემ, ირაკლი კობახიძემ საგანგებო ბრიფინგი გამართა, სადაც რიგ საკითხებთან ერთად ისაუბრა იმაზეც, რომ უნივერსიტეტებსა და სკოლებში "ფაშისტური კამპანია" წარმოებდა "რუსული კანონის" წინააღმდეგ საპროტესტო გამოსვლების დროს. მისი თქმით, შემაშფოთებელი იყო "ნაციონალი ლექტორების" მიერ სახელმწიფო და კერძო უნივერსიტეტების პოლიტიკური პროპაგანდისთვის გამოყენება. კობახიძის მტკიცებით, "ნაციონალი ლექტორები" სტუდენტებს აქციებში მონაწილეობის სანაცვლოდ ნიშნების მომატებას სთავაზობდნენ.